Eski kóligimizdi ótkizý úshin aýyldan arnaıy keldik - Bazargúl Ahmetova
TALDYQORǴAN. QazAqparat - Almaty oblysynda eski kólikterin ótkizip jatqan halyqtyń qarasy qalyń. Baǵdarlama júzege asqannan beri 1597 kólik qabyldanǵan, dep habarlaıdy QazAqparat tilshisi.
Kerbulaq aýdanynyń turǵyny Bazargúl Ahmetova da kóligin ótkizý úshin arnaıy Taldyqorǵanǵa kelgen. Qyzyljar aýylynyń turǵyny eski kóligimen qalaǵa jetkenin aıtady.
"1985 jylǵy mashına. Bizdiń otbasymyzdyń alǵashqy kóligi. Túri eski bolǵanmen, temir tulpardyń jaǵdaıy jaqsy. Bul otbasymyzdyń qutty kóligi. Balalarymyzdy da osy kólikpen aparyp qalaǵa oqýǵa túsirdik. 20 jylǵa jýyq bizge qyzmet etken temir tulpardy qudaǵıymyz ekeýimiz qazir ótkizemiz. Meniń oıymsha, naryqta bul kólikti 150 myń teńgege ótkize almas edim", - deıdi B. Ahmetova.
Qyzyljarlyq turǵyn baǵdarlamanyń óte tıimdi ekenin aıtady. 150 myń teńgege kóligin ótkizip, onyń ústine qarajat qosyp basqa kólik alýǵa nıetti. Jalpy eski kólikti qabyldaý beketiniń Taldyqorǵan óńiri boıynsha menedjeri Baýyrjan Nurahmetov qabyldanǵan kólikterdiń 80 paıyzy Keńes Odaǵy kezinde shyǵarylǵan avtomobıl markalary ekenin aıtady.
"Qalǵany shetelde qurastyrylǵan biraq jyly eskirip tozyǵy jetken kólikter. Jýyrda bir turǵyn 1985 jyly qurastyrylǵan "Porshe-924 " markaly kóligin ótkizdi", - deıdi ol.
Eski kólikter baǵdarlamaǵa sáıkes eki sanat boıynsha qabyldanyp jatyr. Eger kóliktiń jabdyqtary tolyq bolǵan jaǵdaıda 150 myń teńgege baǵalanady. Al eger tek qańqasy, qozǵaltqyshy jáne jyldamdyq rettegishi bolsa, 48 myń teńge bolady. Almaty oblysynyń halqy qazir kólikterin tolyqtaı, ıaǵnı barlyq bólshekterimen ótkizip, 150 myń teńgeden alýda. Óz kezeginde jetisýlyqtar eski kólikterdi satyp alý baǵdarlamasynda belsendilik tanytýda.
