Eski kartanyń arqasynda Koreıa óz jerin qaıtaryp aldy
ASTANA. 29 naýryz. QazAqparat - Eń alǵash ret HІH ǵasyrda jaryqqa shyqqan karta Japonııa men Ońtústik Koreıa talasyp otyrǵan Tokto aralynyń Koreıa menshigi ekenin dáleldep berdi, dep habarlaıdy koreılik «Reınap» aqparat agenttigi.
Bul kartada Japonııa men Tokto araldary eki bólek túspen boıalǵan. Al 1904 jyly jaryq kórgen taǵy bir kartada atalmysh araldar ońtústikkoreıalyq Kanvondo provıntsııasyna qosylyp belgilengen. Sondyqtan zertteýshiler araldardyń Koreıaǵa tıesili ekeni eshbir daý týǵyzbaıdy dep otyr.
Eski kartalar eki el arasynda kópten beri shıelenisip kele jatqan, al sońǵy bir-eki aptada tipten ýshyǵyp ketken jer daýyn túpkilikti sheshýde negizgi dálel retinde usynyldy. Bul kartalardy jarııalaýdaǵy koreılik bıliktiń maqsaty jýyrda Toktony japon jerine «qosatyn» oqýlyq shyǵarǵan japondyq bilim mınıstrligine narazylyq bildirý bolyp tabylady.
Atalmysh oqýlyq japondardyń Toktony ózderi ıemdenip alǵan alǵashqy oqýlyq emes bolyp tur. Sondyqtan da Ońtústik Koreıanyń SІM-i japondyq elshige eskertý joldady.
Tokto - Japon teńizindegi jalpy aýmaǵy 0,2 sharshy shaqyrym bolatyn shaǵyn araldardyń jıyntyǵy. Koreıler ony Tokto dese, japondar Takesıma, al batystyqtar Lıankýr dep ataıdy. Qazir Tokto araldaryn Koreıa baqylaýda ustap otyr. Olardyń málimdeýinshe, bul araldar atam zamandardan beri solardyń menshigi. Alaıda tarıhı derekter boıynsha, olar araldardy Ekinshi dúnıejúzilik soǵystan keıin ǵana ıemdene bastaǵan.
