ESKERTÝ: Terrorlyq qaýiptiń «sary» deńgeıi neni bildiredi?
ASTANA. QazAqparat - Aqtóbe qalasynda 2016 jylǵy 5-6 maýsymda quqyq qorǵaý jáne arnaýly organdary ІІM Ulttyq gvardııanyń áskerı bólimi men qarý-jaraq dúkenderine qarýly shabýyl jasaǵan qylmyskerlerdi anyqtaý, izdeý jáne ustaý boıynsha birlesken jedel-izdestirý sharalaryn júrgizýde. Qalada antıterrorlyq operatsııalar rejımi áreket etýde, dep habarlady QR Ulttyq qaýipsizdik komıtetiniń baspasóz qyzmetinen.
Qalyptasqan jaǵdaıdy eskere otyryp, sondaı-aq bolýy yqtımal kúshteý aktsııalaryna aldyn ala áreket jasaý maqsatynda Qazaqstan Respýblıkasy Antıterror ortalyǵynyń basshysy - UQK Tóraǵasy general-leıtenant V.Z.Jumaqanov QR Prezıdentiniń 2013 jylǵy 9 tamyzdaǵy № 611 Jarlyǵyna sáıkes, 6 maýsymda terrorıstik qaýiptiliktiń «sary» (birqalypty) deńgeıin jarııalady. Atalǵan deńgeı elimizdiń barlyq aýmaǵy boıynsha 40 táýlikke engizildi.
«Sary» deńgeı kúshtik qurylymdarmen jáne memlekettik organdarmen uıymdastyrýshylyq, ákimshilik jáne jedel is-sharalar keshenin ótkizýdi boljaıdy, onyń ishinde:
- bolýy yqtımal terrorıstik jáne ekstremıstik kúshteý aktsııalary týraly aqparattardy jınaý, baǵalaý jáne tekserý;
- terrrorǵa qatysty basqa da osal obektilerdi jáne turǵyndar jappaı jınalatyn oryndardy tekserý;
- arnaıy tehnıkalyq quraldardy paıdalana otyryp, kólikterde qarap-tekserý is-sharalaryn kúsheıtý;
- kóshelerde, alańdarda, stadıondarda jáne turǵyndar jappaı jınalatyn basqa da oryndarda, magıstraldyq temir jol júıelerinde jáne ózge de kólik ınfraqurylymynyń obektilerinde kúsheıtilgen patrýlderdi qoıý;
- bolýy yqtımal terrorıstik qaýip-qaterler men bul jaǵdaıda qajetti áreket týraly turǵyndardy aldyn ala aqparattandyrý.
Ulttyq qaýipsizdik komıteti azamattarǵa sabyrlylyq saqtap, memlekettik jáne quqyq qorǵaý organdarynyń áreketine túsinistikpen qarap, sondaı-aq olarǵa qajetti kómek kórsetýdi ótinip surady.
Qaýipsizdiktiń birinshi kezektegi sharalary retinde saqtyq tanytyp, ıesiz jatqan, ásirese symdar men tehnıkalyq qurylǵylary bar nárselerge (sómkeler, qoraptar, býmalar, qaptar, shabadandar men t.b.), nazar aýdarýdy talap etedi, bundaı jaǵdaıda oǵash kóringen zattarǵa taıanbaı, quqyq tártibi organdaryna tez arada habarlaý qajet.
Sonymen qosa, qoǵamdyq oryndar men kólikterde kúdikti adamdarǵa nazar aýdaryp, olardan belgisiz zattar men sálemdemelerdi saqtaýǵa, berýge jáne tasymaldaýǵa almaý kerek.
QR Antıterror ortalyǵy men Ulttyq qaýipsizdik komıteti jeke adamdy, qoǵamdy jáne memleketti terrorıstik jáne ekstremıstik qaýip-qaterlerden qorǵaý boıynsha qajetti sharalardy qoldanýda.
UQK baspasóz qyzmeti ulttyq qaýipsizdik organdary ahýaldyń ózgerýi men júrgizgen is-sharalar nátıjesi týraly habarlap otyrady.
