Eskertý bolǵan joq – UQShU baıqaýshylary saılaýdy uıymdastyrý deńgeıin joǵary baǵalady
ASTANA. KAZINFORM — Ujymdyq qaýipsizdik týraly shart uıymynyń (UQShU) Parlamenttik Assambleıasynyń halyqaralyq baıqaýshylary Qazaqstandaǵy Quryltaı alǵashqy saılaýynyń joǵary deńgeıde uıymdastyrylǵanyn, saılaý komıssııalarynyń daıyndyq deńgeıin jáne azamattardyń belsendiligin erekshe atap ótti. Tańerteń saılaý ýchaskelerine barǵannan keıin mıssııa músheleriniń daýys berý barysyna qatysty eshqandaı eskertýleri bolǵan joq.
UQShU Parlamenttik Assambleıasynyń halyqaralyq baıqaýshylar tobynyń úılestirýshisi, Reseı Memlekettik Dýmasynyń Qorǵanys komıtetiniń tóraǵasy Andreı Kartapolovtyń aıtýynsha, mıssııa ókilderi tańerteń birneshe saılaý ýchaskesine arnaıy barǵan. Baıqaýshylar №192 ýchaskede onyń ashylý rásimine de qatysqan.
Onyń sózinshe, barǵan barlyq ýchaskeler daýys berýdi ótkizýge qajetti quraldarmen tolyq qamtamasyz etilgen.
— Biz barǵan barlyq ýchaskelerdiń eshqaısysyn bólip-jarmaı atap ótkim keledi: uıymdastyrý deńgeıi de, daıyndyq deńgeıi de óte joǵary. Ýchaskeler saılaýdyń zańnama talaptaryna qatań sáıkes ótýi úshin qajetti jabdyqpen tolyq qamtamasyz etilgen. Bul ýchaskelerde jumys isteýge tartylǵan qyzmetkerler daıyndyqtan ótken, ózderiniń fýnktsıonaldyq mindetterin biledi jáne olardy tolyq kólemde oryndaı alady. Biz bolǵan barlyq ýchaskede jaǵdaı qalypty ári laıyqty deńgeıde ótip jatyr. Adamdar úlken yqylaspen kelip jatyr, olardyń shyn máninde ózderi laıyq dep sanaıtyn úmitkerlerge daýys bergisi keletini kórinip tur. Olar keıin jańadan saılanǵan Quryltaıdan óz oryndaryn tabady, – dedi A.Kartapolov Halyqaralyq baıqaýshylarǵa járdemdesý ortalyǵynda ótken brıfıngte.
Belarýs Ulttyq jınalysy Ókilder palatasynyń Adam quqyqtary, ulttyq qatynastar jáne BAQ jónindegi komıssııasynyń múshesi Edýard Severın azamattardyń saılaýǵa degen joǵary qyzyǵýshylyǵyna mán berdi. Onyń aıtýynsha, demalys kúnindegi saılaýshylardyń belsendiligi olardyń eldiń saıası ómirine aralasýynyń aıqyn kórsetkishi.
— Búgin demalys kúni bolǵanyna qaramastan, adamdar saıası úderisterge, óz memleketiniń saıası ómirine qyzyǵýshylyq tanytyp otyr. Osy turǵyda bolǵan ózgerister Qazaqstannyń memleket retinde, saıası sýbekt retinde, UQShU men TMD múshesi retinde, sondaı-aq osy uıymdarǵa kiretin dostas memleketterdiń seriktesi retinde neǵurlym tabysty, tıimdi ári turaqty damýyna yqpal etetini sózsiz, — dedi Severın.
Qyrǵyzstan Jogorký Keneshiniń Agrarlyq saıasat, sý resýrstary, jer qoınaýyn paıdalaný, ekologııa jáne qorshaǵan ortany qorǵaý jónindegi komıtetiniń múshesi Nılýfar Alımjanova saılaý kúnin tarıhı kún dep atady. Onyń aıtýynsha, mıssııa ókilderi saılaý úderisin úshinshi kún qatarynan baqylap otyr.
— Saılaý kúni ázirge eshqandaı eskertý joq, eshqandaı zań buzýshylyq anyqtalmady. Barlyǵy qatań zańnama talaptaryna saı ótip jatyr. Sonymen qatar, erekshe qajettilikteri bar adamdar úshin de barlyq qajetti sharalar qabyldanyp, tıisti jaǵdaılar jasalǵanyn atap ótkim keledi. Adamdardyń saılaýǵa degen qyzyǵýshylyǵy shynymen joǵary, – dedi N.Alımjanova.
Reseı Federatsııasy Keńesiniń Halyqaralyq ister komıteti tóraǵasynyń orynbasary Baır Jamsýev saılaý ýchaskelerinde azamattardyń erkin tańdaý jasaýyna qajetti jaǵdaılardyń jasalǵanyna nazar aýdardy. Atap aıtqanda, daýys berýge arnalǵan kabınalar tolyq jabdyqtalǵan jáne saılaýshylar qajetti aqparatpen tanysa alatyn stendter ornalastyrylǵan.
— Sondaı-aq saılaý komıssııalarynyń músheleri negizinen mundaı is-sharalardy ótkizýde mol tájirıbesi bar adamdar ekenin erekshe atap ótkim keledi. Olar tıisti oqýdan ótken jáne daýys berý ýchaskelerine kelgen saılaýshylarmen qajetti jumysty tıisti ári kásibı deńgeıde júrgizip jatyr, – dedi Jamsýev.
Mıssııa jumysynyń aralyq qorytyndysyn onyń úılestirýshisi Andreı Kartapolov shyǵardy. Onyń aıtýynsha, mıssııa músheleri saılaý úderisiniń uıymdastyrylýy men daıyndyq deńgeıiniń joǵary ekenin, sondaı-aq azamattardyń daýys berýge belsendi qyzyǵýshylyq tanytyp otyrǵanyn aıtty.
— Taǵy da atap ótkim keledi: biz bolǵan barlyq jerde zańnama talaptarynyń qatań saqtalýynan qandaı da bir aýytqýdyń birde-bir belgisin baıqamadyq. Meniń oıymsha, basqa jerlerden de mundaı jaǵdaıdy kórmeımiz. Qazaqstan halqyn osy merekemen quttyqtaımyn, barshańyzǵa zor densaýlyq pen amandyq tileımin jáne halyqtyń erkin shynymen bildiretin azamattar saılansyn, – dedi Kartapolov.
Baıqaýshylar óz jumystaryn jalǵastyryp jatyr. Olar qalalyq saılaý ýchaskelerimen qatar, aýyldyq jerlerdegi ýchaskelerge de barýdy josparlap otyr. Mıssııa saılaýdy baqylaý jumysy aıaqtalǵannan keıin qorytyndy tujyrymdaryn usynady.
Aıta keteıik, elimizdiń barlyq óńirinde Quryltaı depýtattaryn saılaý ótip jatyr. Daýys berý 10 423 saılaý ýchaskesinde ótedi.
