Eskertý: BQO-da burqasyn kóterilip, jel kúsheıedi
ORAL. QazAqparat - «Qazgıdromet» RMK BQO fılıalynyń málimeti boıynsha 28 qańtar kúni óńirdiń keı jerlerinde burqasyn kóterilip, tuman túsip, kóktaıǵaq bolady, dep habarlaıdy QazAqparat tilshisi.
Ońtústik-batystan soǵatyn jeldiń jyldamdyǵy sekýndyna 15-20 metrge deıin kúsheıedi.
Oral qalasynda da aýa raıy buzylady.
Osyǵan baılanysty BQO TJ departamenti turǵyndar arasynda tótenshe oqıǵalardy boldyrmaý maqsatynda eskertý jarııalady.
Bıyl oblysta qar erekshe mol tústi. Mysaly, Oralda sońǵy 35 jylda mundaı jaǵdaı 1987 jyly oryn alyp, qardyń bıiktigi 55 santımetr bolǵan edi. Oral qalasy ákiminiń baspasóz qyzmetinen alynǵan málimetke qaraǵanda, qańtardyń ózinde qardyń qalyńdyǵy 60 santımetrge jetti. 1-25 qańtarda Oralda 33,6 mm qar tústi, bul aılyq normadan (28 mm) áldeqaıda artyq.
Eske sala keteıik, budan buryn Batys Qazaqstanda boranǵa baılanysty joldar jabylyp, jyl basynan beri qar qursaýynda qalǵan kólikter sany 184-ke jetkenin jazǵan bolatynbyz.
