Eskertkishter tek ásemdik úshin ǵana emes, eldigimizdi aıǵaqtaý úshin de asa qajet - Almaty oblysynyń ákimi
ALMATY. 7 jeltoqsan. QazAqparat - El tutastyǵy jolynda janyn pıda etken babalarǵa taǵzym etý -azamattyq borysh.
Bul týraly búgin Almatyda Raıymbek batyrdyń eskertkishin ashý rásiminde aıtyldy.
«Buǵan deıin Raıymbek baba eskertkishi Almaty oblysynyń Kegen óńirinde boı kóterip, urpaǵy táý eter kıeli orynǵa aınaldy. Al búgin batyrdyń tas músini Almatyda rýhanı qalanyń kórkine kórik, ajaryna ajar qosyp tur. Eskertkishter tek ásemdik úshin ǵana emes, ol eldigimizdi aıǵaqtaý úshin de asa qaje», - deıdi Almaty oblysynyń ákimi Ańsar Musahanov. Onyń aıtýynsha, osy eńseli eskertkishtiń boı kóterýine muryndyq bolǵan «Raıymbek» qoǵamdyq qory men osy ıgi istiń basy-qasynda júrgen azamattar taǵylymy mol shara atqaryp otyr. Endigi rette «Urandy eldiń urpaǵy qaısar keledi» degendeı, qazaqtyń ójettigi men jasampazdyǵyn pash etip turatyn bul týyndynyń bolashaq urpaqty eljandylyqqa tárbıeleýdegi úlesi zor bolmaq. Ol erlik pen órliktiń sımvoly, asyldy ardaqtaýdyń, batyrdy baǵalaýdyń úlgisi, urpaqtar sabaqtastyǵynyń jarqyn kórinisi.
