Eskertkishten urlanǵan áripterdi qoǵamdyq uıym tegin jasap bermek
ALMATY. QazAqparat - Almaty ákimdigi vandaldar qıratqan eskertkishti qalpyna keltirýge kiristi, dep habarlaıdy QazAqparat tilshisi qalalyq Mádenıet basqarmasyna silteme jasap.
Batyr qalalarǵa arnalǵan eskertkish tuǵyrlarynan urlanǵan áripterdi qoǵamdyq uıym tegin jasap beretin boldy.
«Keshe belgisiz bireýler Panfılovshylar saıabaǵyndaǵy batyr qalalarǵa arnalǵan tuǵyrlardaǵy áripterdi, juldyzshalardy julyp ketken. Qazirgi tańda Mádenıet basqarmasy qoǵamdyq uıymdarmen birige otyryp, esrkertkishterdi qalpyna keltirý jumystaryna kiristi. Bir qoǵamdyq uıym áripter men juldyzshalardy tegin qalpyna keltirip berýge nıet bildirip otyr», - dedi qalalyq Mádenıet basqarmasynyń tarıhı-mádenı eskertkishter bóliminiń basshysy Ahat Jolaev.
Onyń aıtýynsha, ázirge keltirilgen shyǵyn kólemi eseptelip jatyr. Keıinirek málimet merdiger uıymǵa berilip, montaj jumystary bastalady.
Aıta ketý kerek, buzaqylar Panfılovshylar parkindegi batyr qalalarǵa arnalǵan eskertkish tuǵyrlardyń áripteri men juldyzdaryn julyp ketken bolatyn.
Ázirge polıtsııa túsinikteme bergen joq.
