Eskendir Súleımenovtyń ólimi: Aıyptalýshy 14 mln teńge ótemaqy tóleýge daıyn
ASTANA. QazAqparat - Astanada jol-kólik oqıǵasynan kóz jumǵan Eskendir Súleımenovtyń isine qatysty sot protsesinde aıyptalýshy Malıka Muhıtova jábirlenýshi tarap talap etken 14,752 mln teńgeni tóleýge daıyn ekenin málimdedi, dep habarlaıdy QazAqparat tilshisi.
Sot protsesi barysynda sýdıa jábirlenýshi taraptyń azamattyq talap-aryzyna baılanysty aıyptalýshyǵa suraq qoıdy.
«Iá, talap boıynsha ótemaqyny tolyǵymen óteýge daıynmyn. Biz ol taraptan bank shotynyń nómirin joldaýdy ótingen edik. Alaıda olar bank shotyn áli jibergen joq», - dedi Malıka Muhıtova.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Eskendir tizgindegen mototsıkl qıylysqa shyqqan kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondaı-aq, qalalyq polıtsııa departamenti Eskendir Súleımenovtiń mototsıkly soǵylǵan júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
Aıta ketsek, 12 qazanda Oljas Súleımenovtiń nemeresiniń ólimine qatysty sot protsesi bastalyp, Eskendir Súleımenov qaza tapqan jol apaty boıynsha sottalýshy Malıka Muhıtova marqumnyń ata-anasynan keshirim suraǵan edi.
Aıta keterligi, ótken sot otyrysynda Eskendir Súleımenovtiń týystary keltirilgen zalaldy óteýdi (14 mıllıon teńge) talap etken.
Degenmen, sot otyrysynan keıin Eskendir Súleımenovtiń anasy ulyna qatysty sottan tek ádil úkim kútetinin málim etken edi.
