Eskendir Súleımenovtiń týystary 14 mln teńge talap etip otyr
ASTANA. QazAqparat - Jol apatynan kóz jumǵan Oljas Súleımenovtiń 26 jastaǵy nemeresi Eskendir Súleımenovtiń týystary keltirilgen zalaldy óteýdi talap etti, dep habarlaıdy QazAqparat tilshisi.
«QR QK-niń 166-baby 1-bóligine sáıkes, qylmystyq iste moraldyq shyǵyn men zalaldy óteý týraly jeke tulǵalardyń azamattyq talaby qaralady. Óteýge bul rette qylmystyń saldarynan keltirilgen shyǵyn, sonymen birge jerleý, jábirlenýshiler men óndiriske qatysýshylardyń protseske qatysýǵa ketken shyǵyny jatady. Jaýap berýshi Muhıtovanyń qylmysynyń saldarynan kelesi rettegi shyǵyn keltirilip otyr: oqıǵa ornynda órtenip, qalpyna keltirýge kelmeıtin 2012 jylǵy mototsıkldiń quny 3 mıllıon 956 myń teńge, jerleýge, janazany ótkizýge jáne asqa ketken qarajat 7,124 mln teńge, sonymen birge sotqa deıingi tergeý amaldaryn ótkizýge ketken shyǵyn 2,542 mln teńge. Keltirilgen zııannyń jalpy somasy 14,752 mln teńgeni quraıdy», - dedi jábirlenýshi taraptyń advokaty búgingi ótken sot otyrysynda.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Eskendir tizgindegen mototsıkl qıylysqa shyqqan kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondaı-aq, qalalyq Іshki ister departamenti Eskendir Súleımenovtiń mototsıkili soǵylǵan júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
Aıta keterligi, 12 qazanda osy iske qatysty sot protsesi bastalyp, Eskendir Súleımenov qaza tapqan jol apaty boıynsha Malıka Muhıtova marqumnyń ata-anasynan keshirim suraǵan edi.
