Eskendir Súleımenovtiń ólimi: aıyptalýshy bas bostandyǵynan aıyrmaýdy surady
ASTANA. QazAqparat - Astanada jol-kólik oqıǵasynan kóz jumǵan Eskendir Súleımenovtiń isine qatysty sot protsesinde aıyptalýshy Malıka Muhıtova aqyrǵy sózin aıtty, dep habarlaıdy QazAqparat tilshisi.
«Keshire alsańyzdar, keshirińizdershi. Munyń qanshalyqty aýyr ekenin bilemin, bulaı bolaryn qalamadym. Taǵy da aıtamyn, ony der kezinde kórgende, apatty boldyrmaý úshin bárin jasar edim. Sizderden taǵy da keshirim suraǵym keledi. Ótinemin, raqym etińizdershi, men eshkimmen aıyrylysqym kelmeıdi... Bul maqsatty eshqashan kózdegen emespin. Qolymnan kelgenshe kómegimdi aıamaımyn", - dedi Malıka Muhıtova óziniń aqyrǵy sózinde.
Ol qaıǵyly oqıǵa bolǵan kúni óz ómiriniń de astań-keseń bolǵanyn aıtty.
"Jaǵdaı qandaı qıyn bolsa da, sizderden keshirim men raqym suraýdan sharshamaımyn. Ótinemin, meni aıańyzdarshy. Kún saıyn Eskendir men sizderdiń keshirgenderińizdi suraımyn. Ár juma saıyn anam jeti shelpek pisirip, marqumnyń jany jánnatta bolsyn dep tilep júr. Ótinemin, túsinistik tanytyńyzdarshy. Eki aı buryn Eskendir túsime kirdi. Jaǵajaıda appaq kıimmen júgirip júrdi, qasynda kishkentaı qyz bar. Maǵan qarap kúlimsiredi. Onyń jaǵdaıy jaqsy bolar dep topshyladym", - dedi aıyptalýshy.
Sóz sońynda Malıka Muhıtova taǵy da bas bostandyǵynan aıyrmaýdy surady.
"Qudaıdyń sol kúni meni emes, ony alyp ketkenine kináli emespin. Ótinemin, meni keshirińizdershi, bas bostandyǵymnan aıyrmańyzdarshy. Meniń ata-anamdy, týystarymdy aıasańyzdar eken. Anam, ákem, ata-ájem kún saıyn qońyraý shalyp jylaıdy. Ótinemin, temir torǵa qamata kórmeńizder", - dedi ol.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Eskendir tizgindegen mototsıkl jol qıylysynda kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Aıta ketsek, 12 qazanda Oljas Súleımenovtiń nemeresiniń ólimine qatysty sot protsesi bastalyp, Eskendir Súleımenov qaza tapqan jol apaty boıynsha sottalýshy Malıka Muhıtova marqumnyń ata-anasynan keshirim suraǵan edi.
Іs boıynsha prokýror Á.Baraev sottan aıyptalýshyny sottan 2 jylǵa bas bostandyǵynan aıyrýdy suraǵan edi.
