Eskendir Súleımenovtiń isi: Prokýror aıyptalýshyny 2 jylǵa bas bostandyǵynan aıyrýdy surady
ASTANA. QazAqparat - Oljas Súleımenovtiń 26 jastaǵy nemeresi Eskendir Súleımenovtiń isi boıynsha sot protsesi aıaqtalýǵa taıap qaldy. Іs boıynsha prokýror Á.Baraev sottan aıyptalýshyny 2 jylǵa bas bostandyǵynan aıyrýdy surady, dep habarlaıdy QazAqparat tilshisi.
«Eskendir Súleımenovtiń Uly Dala kóshesiniń qıylysyn baǵdarshamnyń jasyl túsi janyp turǵan kezde ótpek bolǵany anyqtaldy. Myna jaıǵa mán bere ketý kerek: ol (Súleımenov - avt.) kóshe qıylysynyń 80 paıyzyn ótip, qozǵalysyn aıaqtaýǵa jaqyn qalǵan (...) Júrgizýshi kóligimen solǵa burylý kezinde qarama-qarsy baǵytta kele jatqan kólik quralyna jol berýi kerek», - dedi prokýror búgingi sot otyrysynda.
Aıyptaýshy óz sózinde sot otyrysynda aıyptalýshy Muhıtovanyń QR QK-niń 345-baby 3-shi bóligi (kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýynan abaısyzda adam ólimine ákep soqqan is-áreket) boıynsha kinási dáleldengenin atap ótti.
«Qurmetti sot, jazalaý máselesin sheshe otyryp, ádiletti jaza túrin aıqyndaý úshin barlyq faktiler eskerilýi kerek degen oıdamyn. QR Qylmystyq kodeksiniń 53-shi jáne 54-shi baptaryna sáıkes, aıyptalýshynyń jazasyn jeńildetetin jáne aýyrlatatyn jaıttardyń bári eskerilýi tıis. Jeńildetetin tusqa aıyptalýshynyń qylmysty birinshi ret istep otyrǵanyn, isine ókinetindigin jatqyzýǵa bolady. Al jazany aýyrlatatyn tusty aıyptaýshy tarap kórip otyrǵan joq. Osylardyń bárin eskere kele, Malıka Muhıtovany QR Qylmystyq kodeksiniń 345-baby 3-bóligi boıynsha kináli dep taýyp, eki jylǵa bas bostandyǵynan aıyrý, kólik quralyn basqarý quqyǵynan úsh jyl merzimge aıyrý jazasyn taǵaıyndaý suralady», - dedi prokýror.
Prokýror aıyptalýshy jazasyn qylmystyq-atqarý júıesiniń mınımaldy qaýipsizdik mekemesinde óteýi kerektigin surady.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Eskendir tizgindegen mototsıkl qıylysqa shyqqan kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondaı-aq, qalalyq polıtsııa departamenti Eskendir Súleımenovtiń mototsıkli soǵylǵan júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
Aıta ketsek, 12 qazanda Oljas Súleımenovtiń nemeresiniń ólimine qatysty sot protsesi bastalyp,
Eskendir Súleımenov qaza tapqan jol apaty boıynsha sottalýshy Malıka Muhıtova marqumnyń ata-anasynan keshirim suraǵan edi.
Aıta keterligi, ótken sot otyrysynda Eskendir Súleımenovtiń týystary keltirilgen zalaldy óteýdi (14 mıllıon teńge) talap etken.
Degenmen, sot otyrysynan keıin Eskendir Súleımenovtiń anasy ulyna qatysty sottan tek ádil úkim kútetinin málim etken edi.
