Eskendir Súleımenovtiń isi: Aıyptalýshynyń advokatynyń ýáji qandaı
ASTANA. QazAqparat - Astanada jol apatynan kóz jumǵan Eskendir Súleımenovtiń isi boıynsha aıyptalýshynyń advokaty Dmıtrıı Kýrıachenko óz qorǵaýyndaǵy Muhıtovanyń jol-kólik oqıǵasy kezinde qandaı jyldamdyqpen qozǵalǵany anyqtalmaǵanyn aıtady, dep habarlaıdy QazAqparat tilshisi.
«Avtokóliktiń jyldamdyǵyn sarapshylar anyqtamaǵan. Ýaqyty anyqtalǵan. Dese de, oǵan (aıyptalýshyǵa - avt.) naqty jyldamdyq rejımin buzdy degen aıyp taǵylyp otyr. Bul - onyń (aıyptalýshynyń - avt.) buzýshylyqtarynyń pýnkteriniń biri. Oqıǵanyń logıkasyna súıene otyryp, adamdy jyldamdyq rejımin buzdy dep aıyptamas buryn onyń naqty qandaı jyldamdyqpen kele jatqanyn anyqtaý kerek», - deıdi aıyptalýshynyń advokaty sot otyrysynan keıin tilshilerdiń suraǵyna jaýap bere otyryp.
Sonymen qatar, advokat kóz jumǵan jigittiń qandaı jyldamdyqpen kele jatqany anyqtalǵanyn aıtyp berdi.
Al onyń (kóz jumǵan Eskendir Súleımenovtiń - avt.) jyldamdyǵy - 88 shaqyrym/saǵat bolǵan. Buny sarapshy rastap otyr. Sot istiń bári zertteletinin aıtty. Sarapshysyz jyldamdyqty qalaı anyqtaý kerektigin bilmeımin. Sot sarapshynyń shaqyrylýy týraly ótinishten bas tartqanymen, sarapshydan jaýap alý máselesiniń basyn ashyq qaldyrdy», - deıdi ol.
Sonymen qatar, Dmıtrıı Kýrıachenko saraptama júrgizý týrasynda ótinish maquldanbaǵanyn atap ótti.
«Bálkim, shyǵarylǵan qorytyndyny zertteý barysynda suraqtar týyndap, sarapshy sotqa báribir shaqyrylýy múmkin. Eger ol osy jaǵdaıdy túsindirip berse, shynynda da, saraptama taǵaıyndap, isti sozbalańǵa salýdyń qajeti týyndamas edi. Men bulaı bolsa tolyq kelisemin. Sondyqtan, eger sarapshy óziniń esebimen sotta bizge aıqyndar bermese, árıne saraptama taǵaıyndaý kerek bolady», - deıdi advokat.
Aıta ketsek, Astana qalasynyń Esil aýdandyq №2 sotynda Oljas Súleımenovtiń 26 jastaǵy nemeresi Eskendir Súleımenovtiń jol apatynan kóz jumý jaǵdaıy boıynsha sot protsesi búgin bastalǵan bolatyn.
Eske sala ketsek, osy jyldyń maýsymynda Astanadaǵy jan túrshigerlik jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Apat 22 maýsym kúni Astanadaǵy «Máńgilik el» dańǵyly men «Kereı men Jánibek handar» kóshesiniń qıylysynda bolǵan. Eskendir tizgindegen mototsıkl qıylysqa shyǵyp ketken belgisiz kólikke soǵylǵan edi.
Arada kóp ótpeı Astana qalalyq ishki ister departamenti apatqa sebepker bolýy múmkin «Hyundai» avtokóliginiń ıesi, 29 jastaǵy astanalyq áıelge qatysty tergeý amaldary júrip jatqanyn habarlaǵan edi.
Sondaı-aq Astana qalasynyń Іshki ister departamenti Oljas Súleımenovtiń nemeresi - Eskendir Súleımenovti kóligimen qaǵyp óltirgen júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
