Eskendir Súleımenovtiń anasy: Bizge tek ádil úkim kerek
ASTANA. QazAqparat - Astanada jol apatynan mert bolǵan Oljas Súleımenovtiń nemeresi - Eskendir Súleımenovtiń anasy ulyna qatysty sottan tek ádil úkim kútetinin aıtty, dep habarlaıdy QazAqparat tilshisi.
«Ózimiz jaıly pikirlerdi oqyp otyrsaq, keıbir adamdar «qazir bular minekeı, uldarynyń qunyn aıtyp jatyr» degen sózder kezdesip qalady. Olaı emes! Eshqandaı shyǵynnyń ótelgenin qalamaımyz. Sýdıa bizge «materıaldyq shyǵyndy aıtyńyzdar» degennen keıin ǵana osylaı dedik. Eger olaı bolsa, bizge eshqandaı materıaldyq shyǵyndy óteýdiń qajeti joq. Bizge tek ádiletti úkim kerek. Ol (aıyptalýshy Muhıtova - avt.) jol júrý erejesin buzǵany úshin laıyqty jazasyn alsyn deımiz. Boldy!», - dedi búgingi sot otyrysynan keıin tilshilerge bergen suhbatynda marqum Eskendir Súleımenovtiń anasy Leıla Súleımenova.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy nemeresi Eskendir Súleımenov mert bolǵan edi. Eskendir tizgindegen mototsıkl qıylysqa shyqqan kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondaı-aq, qalalyq polıtsııa departamenti Eskendir Súleımenovtiń mototsıkly soǵylǵan júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
Aıta ketsek, 12 qazanda Oljas Súleımenovtiń nemeresiniń ólimine qatysty sot protsesi bastalyp, Eskendir Súleımenov qaza tapqan jol apaty boıynsha sottalýshy Malıka Muhıtova marqumnyń ata-anasynan keshirim suraǵan edi.
Al búgingi sot otyrysynda Eskendir Súleımenovtiń týystary 14 mln teńge kóleminde ótemaqy talap etti.
