Eskendir Súleımenov isi: Aıyptalýshy tarap 14 mln teńge ótemaqy týraly pikir bildirdi
ASTANA. QazAqparat - Eskendir Súleımenovtiń ólimine ákep soqqan jol apatyna qatysty aıyptalýshy taraptyń advokaty Dmıtrıı Kýrıachenko qarsy taraptyń 14 mln teńgelik talaby týraly pikir bildirdi, dep habarlaıdy QazAqparat tilshisi.
«Soma týraly buǵan deıin naqtylyq bolmap edi. Qazirgi tańda shyǵynnyń somasy aıqyndaldy. Múmkindik bar. Biraq sizder, menińshe, jábirlenýshi taraptyń pikirin suraýlaryńyz kerek sekildi. Biz dıalogqa ashyqpyz. Áý basta ol týraly málimdegen bolatynbyz», - deıdi advokat.
Sonymen birge, advokat óz qorǵaýyndaǵy Malıka Muhıtovanyń qandaı jyldamdyqpen kele jatqany anyqtalmaǵanyn, bul durys emes ekenin jetkizdi.
«Kúni búginge deıin belgisiz. Oǵan qaýipsizdik qozǵalysyn qamtamasyz etpeıtindeı jyldamdyqpen qozǵalǵany aıtylyp jatsa da, naqty jyldamdyq áli anyqtalmaǵan. Al bul rette onyń qozǵalysynyń anyqtalýy is úshin asa mańyzdy», - deıdi ol.
Eske sala ketsek, osy jyldyń maýsymynda Astanadaǵy jol apatynda Oljas Súleımenovtiń 26 jastaǵy jıeni Eskendir Súleımenov mert bolǵan edi. Eskendir tizgindegen mototsıkl qıylysqa shyqqan kólikke soǵyldy.
Arada kóp ótpeı Astana qalalyq Іshki ister departamenti apatqa sebepker bolýy múmkin Hyundai avtokóliginiń ıesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondaı-aq, qalalyq polıtsııa departamenti Eskendir Súleımenovtiń mototsıkly soǵylǵan júrgizýshi Qyzylorda oblystyq Іshki ister departamenti bastyǵynyń qyzy ekenin rastaǵan.
Aıta ketsek, 12 qazanda Oljas Súleımenovtiń nemeresiniń ólimine qatysty sot protsesi bastalyp, Eskendir Súleımenov qaza tapqan jol apaty boıynsha sottalýshy Malıka Muhıtova marqumnyń ata-anasynan keshirim suraǵan edi.
Al búgingi sot otyrysynda Eskendir Súleımenovtiń týystary 14 mln teńge kóleminde ótemaqy talap etti. Sot otyrysy kezinde marqumnyń anasy sottan tek qana ádil úkim kútetinin jetkizdi.
