Eskendir Ibragım: Endi kók týdy kásipqoı boksta jelbiretemin

ASTANA. QazAqparat - Qazaqtyń án áleminde «Kók týdyń jelbiregeni» ánimen tanylǵan Eskendir Ibragımdi bul kúnde qazaqtyń tanymaıtyny kemde-kem. Al ony sportshy retinde eshkim kóz aldyna elestete almaıtyny aıdan anyq. Kesheden beri otandyq BAQ ókilderi «Eskendir Ibragım kásipqoı boksqa aýysypty» dep jarysa jazdy. Bul áńgimeniń anyq-qanyǵyn bilý úshin QazAqparat tilshisi ánshiniń ózimen tikeleı baılanysqa shyǵyp, shaǵyn suhbat aldy.

- Eskendir biz sizdi ánshi retinde keńinen tanımyz. Alaıda, kesheden beri «siz kásipqoı boksta alǵashqy aıqasyn ótkizgeli jatyr» degen áńgimeler jeldeı esip jatyr. Bul qanshalyqty ras?

- Iá, bul aqparattyń esh jalǵandyǵy joq. Bári de ras. Alla qalasa, erteń Reseı astanasy Máskeý qalasynda kásipqoı bokstaǵy alǵashqy jekpe-jegimdi ótkizgeli jatyrmyn.

- Jekpe-jekke qanshalyqty daıynsyz?

- Men án áleminde sahnaǵa eshqashan daıyndyqsyz shyqqan emespin. Al bul sharshy alań, rıng. Onyń ústine alǵashqy aıqasym bolǵandyqtan úlken daıyndyqpen shyqqaly otyrmyn.

- Qarsylasyńyz kim? Ol týraly jaqsy bilesiz be?

- Men onyń MMA-dan (aralas jekpe-jek - avt.) álem chempıony ekenin jaqsy bilemin. Ońaı jeńiletin qarsylas emes. Biraq, qazaq ejelden jaýynger halyq ekenin sizde jaqsy bilesiz. Eshkimnen qaımyǵaıyn dep turǵan joqpyn.

- Qaı eldiń boksshysy?

- Qyrǵyzstandyq Sherǵazy Saqtanov degen boksshy.

- Qaı salmaqta synǵa túsesiz?

- 168 fýntta (76,2 kg - avt.) judyryqtasamyn.

- Osyǵan deıin bokspen aınalysyp kórgen be edińiz?

- Iá, 2001 jyldan bastap, 2007 jylǵa deıin kásibı túrde bokspen aınalystym. Ol kezde ataqty boksshy Amanjol Baqaev degen aǵamyz jattyqtyrǵan bolatyn. Alaıda, osy 2007 jyly jattyǵý barysynda aýyr jaraqat alyp, anam sportpen aınalyspaýǵa keńes berdi. Sodan keıin bokstan qol úzip kettim. Alaıda, qazirge deıin aptasyna úsh ret jattyǵý zalyna baryp, jattyǵýymdy jalǵastyryp keldim. Jalpy formamdy saqtadym.

- Rıngke qaıta oralýyńyzǵa ne sebepshi boldy?

- Aqtóbede bir jattyǵý kezinde qazaqtyń maqtan tutar azamattarynyń biri, belgili boksshy Jalǵas Tókeshov degen aǵamyz maǵan boksqa qaıta oralýymdy ótindi. Múmkin sol kezde meniń bir múmkindikterimdi baıqap qalǵan sııaqty. Sodan keıin, ózim ishteı daıyndalyp, jattyǵýǵa birjola bet burdym.

- Osy jekpe-jegińizge qaıda daıyndaldyńyz, kimder jattyqtyrdy?

- Bul jekpe-jekke belgili boksshy Bobyrjan Momynov degen dosym jattyqtyrdy. Esterińizde bolsa Momynov Saýl «Kanelo» Alvarestiń Gennadıı Golovkınge qarsy jekpe-jegi aldynda oǵan sparrıng qarsylas bolǵan edi. Jaqynda ol Astanaǵa kelip maǵanda qolushyn berdi. Sonymen qatar Danabek Sýjanov, Baqytjan Qojabek sııaqty boksshy dostarym kómektesti. Barlyǵyna alǵys aıtamyn.

- 2007 jyldan beri týra 10 jyl ótipti. Babyńyzǵa kelý qıyn bolmady ma?

- Árıne, ońaı emes. Biraq, qajyrly eńbek ete bilgen adamǵa qıyn dúnıe joq. Máskeýge úlken daıyndyqpen keldim. Buıyrsa, jeńiske jetemin degen oıdamyn.

- Alǵashqy aıqasyńyz sátti ótse, ary qaraı da osy kásipqoı boksty serik etip qala beresiz be?

- Negizi bala kúnimdegi armanym myqty boksshy ataný bolatyn. «Igilikti istiń erte-keshi bolmaıdy» deıdi ǵoı. Alla sátin salsa, kóremiz. Qazir mıllıard halqy bar Qytaıda kásipqoı boksta ataǵy shyqqan sportshy joq. Al az ǵana qazaqtan qanshama maqtan tutatyn myqty boksshy shyqty. Sondyqtan menen de úlken úmit kútińizder.

- Sizdi qazaq jurty «Kók týdyń jelbiregeni» ánimen jaqsy tanıdy. Endi osy aldaǵy aıqastarǵa shyǵatyn kezde osy ándi shyrqap shyǵý oıyńyzda bar ma?

- Án áleminde kók baıraǵymdy jelbirettim. Endigi maqsatym - sol kók týymyzdy kásipqoı boksta jelbiretý. Eger uıymdastyrýshylar kelisimin berip jatsa, sol ánmen shyǵatyn bolamyn.

- Áńgimeńizge rahmet! Sizge sáttilik tileımiz...