Eskendir Hasanǵalıevtiń ánderin oryndaýshylardyń «Atameken» halyqaralyq festıvali aıaqtaldy

ORAL. QazAqparat – Oralda QR halyq ártisi, Memlekettik syılyq pen «Otan» ordeniniń ıegeri, ánshi-kompozıtor Eskendir Hasanǵalıev ánderin oryndaýshylardyń HІІ halyqaralyq «Atameken» festıvali máresine jetti, dep habarlaıdy QazAqparat tilshisi.

Eki kezeńnen turatyn dástúrli án saıysyna Qazaqstan óńirlerinen, Reseıden barlyǵy 21 úmitker qatysty. Qytaıdan bir oryndaýshy qashyqtyqtan baq synady.

E. Hasanǵalıevtiń uly, ánshi-kompozıtor Birjan Hasanǵalıev bastaǵan qazylar alqasynyń sheshimimen shymkenttik Aınur Nazarbekova bas júldege (1 mln teńge) ıe boldy.

Sondaı-aq, Astana qalasynan kelgen Muratbek Haırolda birinshi (650 myń teńge), túrkistandyq Óserbaı Bórihanov ekinshi (500 myń teńge), Ulytaý oblysynyń ókili Aıbek Abdyashımuly men batysqazaqstandyq Rýstam Hafızov úshinshi (300 myń teńgeden) orynǵa kóterildi.

Reseıden kelgen Tasqyn Ájibaı Hasanǵalıevter áýletiniń, almatylyq Erik Tólenov «Hasanǵalıevter álemi» qorynyń júldesin enshiledi.

Batysqazaqstandyq Arýjan Bısembaı, atyraýlyq Merjan Qabdolov, Abaı oblysynan Oljas Ospan dıplomant atandy.

Festıval aıasynda «Esińe al» atty Eskendir Hasanǵalıevti eske alý kontserti boldy. Úsh kúnge sozylǵan án merekesi gala-kontsertpen qorytyndylandy.

Birjan Hasanǵalıev pandemııaǵa baılanysty «Atameken» án festıvaliniń úsh jyldaı ótpeı qalyp, qaıta jalǵasyn tapqanyn, sol úshin Aq Jaıyq jurtshylyǵyna rıza ekendigin jetkizdi.