Eskendir Harsan jeńilip kórmegen amerıkalyq boksshyny nokaýtqa jiberdi

NUR-SULTAN. QazAqparat – Qazaqstandyq kásipqoı boksshy Eskendir Harsan jeńilip kórmegen amerıkalyq Isıdro Ochoany (7-0, 3KO) nokaýtqa túsirdi. Bul týraly QazAqparat VKontakte áleýmettik jelisindegi «Qazaqstannyń kásipqoı boksy» paraqshasyna silteme jasap habarlaıdy.

Olardyń jekpe-jegi Las-Vegastyń (AQSh, Nevada shtaty) T-Mobile arenasynda ótken boks keshin ashty. Shoýdyń basty aıqasy sýperaýyr salmaqtaǵy álemniń burynǵy chempıony, brıtandyq Taıson Fıýrı (28-0-1, 20KO) men shved Otto Vallın (20-0, 13 KO) arasynda ótti.

Ekinshi asa jeńil salmaqtaǵy Harsan - Ochoa kezdesýi segiz raýndqa eseptelgen bolatyn. Besinshi raýndta qazaqstandyq boksshy qarsylasyn nokdaýnǵa túsirdi. Al úzilis kezinde belgili bapker Roberto Garsııa qamqorlyǵyndaǵy boksshynyń odan ári aıqaspaıtynyn málimdedi.

Osylaısha, 22 jastaǵy Eskendir profı-rıngtegi jetinshi jekpe-jeginde (onyń altaýyn nokaýtpen) jetinshi ret jeńiske jetti. Al buǵan deıingi jeti aıqasyn da jeńispen aıaqtaǵan Ochoa (úsheýin merziminen buryn), alǵash ret jyǵyldy.

Eskendir Harsannyń kásipqoı bokstaǵy isin @MTK_Kazakhstan menedjerlik kompanııasy júrgizedi. Ol WBC Inter-Continental boıynsha jas chempıon tıtýlynyń ıesi. Kásipqoı rıngte 2017 jyldan beri óner kórsetip júr. Sporttaǵy 7 aıqastyń beseýin - AQSh-ta, bireýin - Qazaqstanda ótkizdi.

⠀