Eskendir Harsan Las-Vegastaǵy jekpe-jek aldynda salmaq ólshedi

NUR-SULTAN. QazAqparat – Qazaqstandyq kásipqoı boksshy Eskendir Harsan (6-0, 5KO) amerıkalyq Isıdro Ochoamen (7-0, 3KO) jekpe-jek aldynda salmaq ólshedi, dep habarlaıdy QazAqparat Kásipqoı boks qaýymdastyǵyna silteme jasap.

Ekinshi jeńil salmaqtaǵy aıqas erteń, ıaǵnı 15 qyrkúıek kúni Nur-Sultan ýaqytymen saǵat 05:00-de Las-Vegastyń (AQSh, Nevada shtaty) T-Mobile arenasynda ótedi. Jekpe-jek 8 raýndtan turady. ⠀

Qazaqstandyq boksshy qarsylasynan birshama aýyr bolyp shyqty. Eskendirdiń salmaǵy - 122,4 fýnt bolsa, Isıdro Ochoanyki - 122 fýnt.

Bul keshtiń basty oqıǵasy – sýperaýyr salmaqtaǵy burynǵy álem chempıony brıtandyq Taıson Fıýrı (28-0-1, 20KO) men shvetsııalyq Otto Vallınniń (20-0, 13KO) aıqasy.

Eske sala keteıik, 22 jastaǵy Eskendir Harsan - WBC Inter-Continental boıynsha jas chempıon tıtýlynyń ıesi. Bıyl ol «MTK Kazakhstan» kompanııasymen kelisimshartqa otyrdy. Boksshy kásipqoı rıngte 2017 jyldan beri óner kórsetip júr. Sporttaǵy 6 aıqastyń beseýin - AQSh-ta, bireýin - Qazaqstanda ótkizgen.