Eskekten respýblıkalyq jarysta astanalyqtar top jardy
ASTANA. 17 qyrkúıek. QazAqparat - Baıdarkamen jáne kanoemen esý jarysynda komandalyq esepte astanalyq oqýshylar jeńimpaz atandy.
Bul týraly astana.kz saıtyna Eskek esý sport túrleri federatsııasynyń baspasóz qyzmetinen habarlady.
Elordanyń namysyn qorǵaǵan 27 sportshy jarys barysynda 927 upaı jınap, úzdik nátıjege qol jetkizdi.
Ekinshi orynda 925 upaımen 28 sportshydan qurylǵan Almaty qalasynyń komandasy. Jezqazǵandyq 16 esýshi 763 upaımen úshinshi orynǵa taban tiredi.
Eske salaıyq, oqýshylar arasyndaǵy el birinshiligine elimizdiń 12 óńirinen 170 sportshy qatysty.
Jarys Almaty qalasynyń mańynda ornalasqan Birinshi mamyr kólinde ótkizildi.
