Eskekshi Sergeı Emelıanovty Tokıo Olımpıadasyna polshalyq maman daıyndaıdy
ASTANA. QazAqparat - Jasóspirimder men jastar arasynda baıdarkada jáne kanoede esýden bes dúrkin álem chempıony, qazaqstandyq sportshy Sergeı Emelıanovty Qytaıda eki Olımpıada chempıonyn baptap shyǵarǵan ataqty bapker Marek Ploch jattyqtyrmaq. Sonymen qatar, Sergeıdiń 23 jastaǵy aǵasy Tımofeı de polıaktyń qol astynda tárbıelenbek.
Bul týraly «QazAqparat» tilshisine bergen suxbatynda Baıdarkada jáne kanoede esýden Ońtústik Qazaqstan boıynsha federatsııasynyń prezıdenti Denıs Jármenov málim etti.
«Emelıanov aǵaıyndarymen jumys josparly túrde qolǵa alyndy. Olardyń maqsaty - Tokıo Olımpıadasynda nátıje kórsetý. Baıdarkada jáne kanoede esýden Ońtústik Qazaqstan boıynsha federatsııasy polshalyq jattyqtyrýshymen kelissózder júrgizgen bolatyn. Kelesi jyldan bastap, ol aǵaıyndy Emelıanovtardy jattyqtyra bastaıdy», - deıdi D. Jármenov.
Onyń aıtýynsha, Sergeı besinshi álem chempıony ataǵyn qos adamdyq kanoede 1000 metrlik jarysynda aǵasy Tımofeımen birge jeńip aldy.
Jastar arasyndaǵy álemdik doda Belarýs astanasy Mınskide ótken bolatyn. Oǵan 62 elden 1300 sportshy qatysty.
«Qazaqstan tarıxynda alǵash ret otandyq eskekshiler 23 jasqa deıingi jastar arasyndaǵy álem chempıonatynan júlde aldy. Sol kezde Sergeı Emelıanenko óziniń júldelerin beske deıin jetkizip, Qazaqstannyń eń tıtýldy eskekshisi atandy», - dedi ol.
