Eskekshi Marııa Brovkova álem chempıonatynda taǵy bir medal jeńip aldy

ORAL. QazAqparat - Qazaqstandyq eskekshi Marııa Brovkova Italııanyń Aýronzo qalasynda baıdarka men kanoedan jasóspirimder men jastar arasynda ótip jatqan álem chempıonatynda taǵy bir medal jeńip aldy, dep habarlaıdy QazAqparat tilshisi.

Sportshynyń anasy ári jeke bapkeri Elena Brovkovanyń málim etkenindeı, búgin Marııa 18 jasqa deıingiler arasynda bir adamdyq kanoeda 200 metr qashyqtyqta úzdik úshtikke ilikti.

Majarstandyq Agnes Kıss chempıon atansa, kanadalyq Elızavet Makartýr kúmis júldege ıe boldy. Marııa Brovkovaǵa bul joly qola medal buıyrdy.

Sóıtip, M.Brovkova osy birinshiliktiń ózinde altyn, kúmis jáne qola aldy. Endi 5000 metrlik qashyqtyq qaldy.

Eske sala keteıik, budan buryn qazaqstandyq eskekshi Marııa Brovkovanyń taǵy da álem chempıony atanǵanyn jazǵan bolatynbyz.

Sondaı-aq Marııa Brovkova álem chempıonatynyń kúmis júldegeri atandy.