Eskek esýden ótken Azııa chempıonatynda qaraǵandylyqtardyń mereıi ústem boldy
ASTANA. QazAqparat - Qylqaıyqta jáne eskekti sport qaıyǵynda eskek esý boıynsha ótken Azııa chempıonatynda Qaraǵandy oblysynyń ókili Vladımır Petrov úsh altyn medaldi jeńip aldy, dep habarlaıdy óńir basshysynyń resmı saıty .
Sondaı-aq Darıa Razýmovıch atalmysh birinshiliktiń jeńimpazy ári júldegeri atandy.
Halyqaralyq týrnır Shanhaıda ótti. Qazaqstan quramasy bul chempıonatta jalpykomandalyq esete 1-shi oryndy ıelendi. Bizdiń eskekshilerdiń enshisinde 15 altyn, alty kúmis jáne bes qola medal. Ekinshi orynda qytaılyqtar, al Ózbekstan quramasy úshinshi oryndy qanaǵat tutty. Jarysqa 27 elden kelgen sportshylar qatysty.
Jalpykomandalyq jeńiske Qaraǵandy oblysynyń sportshylary da óz úlesterin qosty. 25 jasar Vladımır Petrov qazaqstandyq tórttik quramynda 200,500 jáne 1000 (kanoe) metrlik qashyqtyqtarta jaqsy óner kórsetip, úsh márte Azııa chempıony atandy.
Darıa Razýmovıch úsh qazaqstandyq soprtshymen qosa 500 metrlik qashyqtyqta qylqaıyqpen ótip, altyn medal oljalady.Ol sondaı-aq Anastasııa Berezovskaıamen birge 200 metr qashyqtyqta óner kórsetip, ekinshi oryndy ıelendi.
Vladımır Petrov 2004 jyldan bastap eskek esýmen aınalysady. Ol Qaraǵandy oblysynyń joǵarǵy sport sheberligi mektebinde jattyqtyrýshy bolyp qyzmet etedi. Jaqynda ǵana 18 jasqa tolǵan Darıa Razýmovıch Azııa chempıonynyń shákirti.
- Ol keleshegi bar sportshy, eskek esýmen bes jyl aınalysady,- deıdi Vladımır Petrov. - Men úshin jattyqtyrýshy retinde Darıanyń jetistikteri basqa tárbıelenýshilerimniń arasynda eń joǵarysy. Bul tek bastamasy ǵana dep oılaımyn. Shanhaıda ótken chempıonat jaqsy uıymdastyrylǵan. Menińshe, barlyǵymyz jaqsy daıyndaldyq ári tek qana altynǵa kóz tiktik. Jáne solaı bolǵanyna qýanyshtymyn. Sondaı-aq Darıanyń jetistikteri meni qýantty. Onymen bizdiń tek bir maqsatymyz bar - ol Azııa oıyndary -2018 jáne 2020 jylǵy Olımpıada.
