Eskek esýden Azııa chempıonatynda Qazaqstan quramasy birinshi orynǵa ıe boldy
ORAL. QazAqparat - Qytaıdyń Shanhaı qalasynda baıdarka men kanoedan márege jetken Azııa chempıonatynda Qazaqstan quramasy jalpykomandalyq esepte birinshi oryndy jeńip aldy, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, qazaqstandyqtar 8 altyn, 3 kúmis, 2 qola júldege ıe boldy. Qytaı quramasy ekinshi, ózbekstandyqtar úshinshi orynǵa kóterildi.
Eresekter men jastar arasynda ótken birinshilikke 27 eldiń sportshylary qatysyp, baq synady.
Qazaqstan quramasy sapynda batysqazaqstandyqtar Alekseı Dergýnov pen Andreı Ergýchev te asa sátti óner kórsetti. Aldymen A.Dergýnov eki kisilik baıdarkada astanalyq Sergeı Tokarnıtskıımen birge 200 metrlik qashyqtyqta chempıon atansa, A.Ergýchev tórt kisilik baıdarkada Qazaqstan quramasy sapynda 1 myń metrden jarysýda qola medalǵa qol jetkizdi. Sodan keıin A.Ergýchev 1 myń metrden eskek esýde almatylyq Ilıa Golendovpen birge jeńimpaz atandy. Sosyn A.Ergýchev pen A.Dergýnov tórt kisilik baıdarkada qazaqstandyq áriptesterimen birge 500 metrlik qashyqtyqta máre syzyǵyn birinshi bolyp qıdy.
Aıta keteıik, bulardyń ekeýi de - halyqaralyq dárejedegi sport sheberleri, Azııa oıyndarynyń jeńimpazy. A.Dergýnov úsh olımpıadaǵa qatyssa, A.Ergýchev Rıo aıdynynda baq synaǵan bolatyn.
