Eskalatsııa atysty toqtatýǵa jáne beıbitshilikke alyp kelmeıdi — Eýrokeńes basshysy
ASTANA. KAZINFORM – Dúısenbi kúni Eýropalyq keńestiń basshysy Antonıý Koshta Iran tóńiregindegi qaqtyǵystyń odan ári ýshyǵý qaýpi bar ekenin eskertip, barlyq tarapty azamattyq ınfraqurylym nysandaryna soqqy jasaýdan bas tartýǵa shaqyrdy, dep habarlaıdy Qazınformnyń Brıýsseldegi menshikti tilshisi.
— Eskalatsııa atysty toqtatýǵa jáne beıbitshilikke alyp kelmeıdi. Buǵan tek kelissózder, naqtyraq aıtqanda, óńirlik seriktesterdiń jalǵasyp jatqan kúsh-jigeri ǵana qol jetkize alady, — dep jazdy A.Koshta áleýmettik jelidegi paraqshasynda.
Onyń aıtýynsha, azamattyq nysandarǵa jasalatyn kez kelgen shabýyl, eń aldymen energetıkalyq obektilerge baǵyttalǵan soqqylar zańsyz ári jol berýge bolmaıtyn áreket bolyp sanalady.
A.Koshta soǵys aýqymy keńeıgen jaǵdaıda basty zardapty Irannyń qarapaıym turǵyndary tartatynyn erekshe atap ótti.
Buǵan deıin Eýropalyq keńestiń basshysy A.Koshta Iran prezıdenti Masýd Pezeshkıanmen, sondaı-aq Izraıl, BAÁ jáne Pákistan basshylarymen telefon arqyly sóılesken.
— Men Iran prezıdentimen jýyrdaǵy áńgimemde atap ótkenimdeı, Eýropalyq odaq Tegerandy óńir elderine qarsy shabýyldardy dereý toqtatýǵa jáne Ormýz buǵazy arqyly keme qatynasynyń tolyq erkindigin qalpyna keltirýge tabandy túrde shaqyrady. Eskalatsııa atysty toqtatýǵa jáne beıbitshilikke alyp kelmeıdi. Buǵan tek kelissózder arqyly, naqtyraq aıtqanda, óńirlik seriktester jetekshilik etip otyrǵan jalǵasyp jatqan kúsh-jiger aıasynda ǵana qol jetkizýge bolady, — dep atap ótti EO basshysy.
Aıta keteıik, Brıýssel óńirlik oıynshylardyń dıplomatııalyq kúsh-jigerin qoldaıdy jáne shıelenisti tómendetýge járdemdesýge daıyn. Sonymen qatar eýropalyqtar óńirdegi energetıkalyq nysandarǵa soqqy jasaýǵa qarsy ekenin bildirdi.
Eske sala ketspek, Taıaý Shyǵystaǵy qaqtyǵys saldarynan Eýroodaq elderinde gaz baǵasy 70%-ǵa ósti.
