Eski vıdeo qaıta dúrbeleń týǵyzdy: sarbazǵa qatysty kadrdyń shyndyǵy qandaı
ASTANA. KAZINFORM — Qorǵanys mınıstrligi áleýmettik jelide qaıta taraǵan sarbazdyń jaǵdaıyna qatysty vıdeonyń 2024 jyly túsirilgenin málimdedi.
— Áleýmettik jelilerde áskerı ant qabyldaý rásimi kezinde sarbazdyń basy aınalyp, ózin jaısyz sezingen sáti túsirilgen beınejazba qaıtadan taralyp jatyr. Alaıda bul oqıǵa bıyl emes, 2024 jyly Aıagóz garnızonynda bolǵan, — dep habarlady vedomstvodan.
Qorǵanys mınıstrliginiń málimetinshe, «sarbazdyń jaǵdaıy qatty tolqyǵandyqtan nasharlaǵan. Onyń densaýlyǵyna qaýip tónbegen. Medıtsınalyq kómek der kezinde jáne tolyq kólemde kórsetilgen».
JAQ.Ortcom Jalǵan aqparatqa qarsy is-qımyl ortalyǵyna belgili bolǵandaı, atalǵan áskerı qyzmetshi merzimdi áskerı qyzmetin tolyq ótep, keıin zapasqa shyǵarylǵan.
Demek, qazir áleýmettik jelilerde taralyp jatqan beınejazba qazirgi jaǵdaıǵa qatysty emes. Oqıǵanyń bolǵan ýaqyty men mán-jaıyn kórsetpeı, arhıvtik kadrlardy qaıta jarııalaý aýdıtorııany jańylystyryp, qoǵamda negizsiz alańdaýshylyq týǵyzýy múmkin.
— Ortalyq blogerler men jańalyqtar pablıkterin aqparat taratqanda jaýapkershilik tanytyp, jarııalanatyn málimetterdiń shynaıylyǵyna kóz jetkizýge shaqyrady. Kórineý jalǵan aqparatty qasaqana taratý zańnamaǵa sáıkes quqyqtyq jaýapkershilikke ákep soǵýy múmkin, — dep eskertti mınırstrlikten.
Eske sala keteıik, buǵan deıin Qazaqstannyń arnaıy operatsııalar kúshteri týraly jalǵan aqparat taraǵan edi.
