«Eski vıdeo»: Araltuz tóńireginde taǵy daý týdy
QYZYLORDA. KAZINFORM – Áleýmettik jelide Qyzylorda oblysynyń Aral aýdanynda ornalasqan «Araltuz» kompanııasy tóńireginde daýly beınejazba tarady.
Beınejazba avtory tuz óndirýshi kásiporynnyń tabysy men jergilikti turǵyndardyń áleýmettik jaǵdaıyna qatysty másele kóterdi. Onyń aıtýynsha, kásiporyn jylyna shamamen 20 mlrd teńge tabys tapqanymen, jergilikti halyqtyń jalaqysy tómen. Avtor Araldyń mol tabıǵı baılyǵy halyqtyń ál-aýqatyn arttyrýǵa da úles qosýy kerektigin aıtyp, kásiporyn qyzmetine qatysty birqatar másele kóterdi.
Alaıda jergilikti atqarýshy organdar bul vıdeonyń buryn túsirilgenin alǵa tartty.
- «Araltuz» kompanııasyna qatysty áleýmettik jelilerde taralǵan aqparat eskirgen ári shyndyqqa sáıkes kelmeıdi. Atalǵan kásiporynnyń dırektory Taýasarov 2021 jyldan beri bul qyzmetti atqarmaıdy. Qazirgi ýaqytta kásiporyndaǵy jaǵdaı turaqty, óndiristik qyzmet qalypty rejımde júrgizilip keledi, - dep málimdedi oblystyq kásipkerlik jáne ónerkásip basqarmasy.
Kompanııanyń negizgi óndiristik orny Aral aýdanynyń Jaqsyqylysh eldi mekeninde qonys tepken. Aýdan ákimdigi de bul vıdeonyń burynǵy ekenin, jaǵdaıdyń qalypqa kelgenin atap ótti.
- Qazirgi tańda zaýytta 900-ge jýyq adam jumys isteıdi. Jalaqylary ýaqytyly tólenip keledi. Keıingi eki jylda qyzmetkerlerdiń jalaqysy 20 paıyzǵa ósken. Kásiporynda ahýal turaqty. Shtattyq rejımde jumys jasap tur, - delingen aýdan ákimdigi taratqan resmı habarlamada.
Odan bólek «Araltuz» AQ Jaqsyqylysh kentinde túrli áleýmettik jobalardy iske asyryp jatqanyn jetkizdi. Atap aıtqanda, balalarǵa arnalǵan oıyn alańyn salyp, №19 orta mektepke oqý qural-jabdyqtaryn alyp berip, ózge de túrli qaıyrymdylyq sharalaryna atsalysqan.
Beınejazba avtory tuzdyń ekskavatormen qazylyp alynýy tabıǵı qordyń sarqylýyna ákelýi múmkin ekenin, óndiris jumysyna qatysty ekologııalyq baqylaýdyń jetkiliksiz ekenin alǵa tartqan. Onyń sózinshe, tuz qory osylaı ıgerile berse, aldaǵy 30 jylda tabıǵı baılyqtyń azaıý qaýpi bar. Osyǵan baılanysty ol Memleket basshysy Qasym-Jomart Toqaevtan kásiporyn jumysyna táýelsiz komıssııa jiberip, tuz óndirý tehnologııasy men ekologııalyq talaptardyń saqtalýyn tekserýdi suraǵan.
Osy máselege baılanysty Kazinform tilshisi «Araltuz» AQ basshylyǵy men Qyzylorda oblystyq ekologııa departamentine resmı saýal joldady.
Eske salaıyq, Kazinform tilshisi buǵan deıin ýran óndirisi ornalasqan aýmaqtaǵy aýyzsýdyń sapasy men radıatsııalyq fonnyń deńgeıin zerttep kórdi.
