Eski úıge kirgen kezde júregim aýyrady – Almaty ákimi
ALMATY. KAZINFORM - Almaty ákimi Túrksib aýdanyndaǵy eski turǵyn úılerdi jańartý baǵdarlamasy boıynsha qurylys salý jáne turǵyndardy kóshirý barysymen tanysty.
Investıtsııalyq joba sharty men Almaty qalasy ákimdiginiń 2020 jylǵy 11 qyrkúıektegi qaýlysy negizinde Túrksib aýdanynda Seıfýllın, Kassın, Kotelnıkov, Aqan seri kósheleriniń aýmaǵyndaǵy «Qazaq Stroy» qurylys salýshysy 8 kóppáterli turǵyn úıdi salyp jatyr.
2022 jyly osy aýmaqta birinshi kezek boıynsha 119 páterge arnalǵan 6 qabatty eki úı salynyp, paıdalanýǵa berildi, oǵan jaqyn mańdaǵy eski úılerdiń turǵyndary kóshirildi.
Ekinshi kezekti turǵyn salý úshin eki qabatty 12 eski úı buzyldy. Olardyń ornynda bıyl maýsym aıynda 429 páterge arnalǵan 6 kóppáterli úıdiń qurylysy aıaqtalady, onyń 130-y – eski turǵyn úı turǵyndaryna arnalǵan.
Úshinshi kezekti úı salýdy bastaý úshin 160 páterden turatyn 18 eski úıdiń turǵyndaryn ekinshi kezektegi úılerge kóshirý qajet. Alaıda 34 menshik ıesi kóshýge áli kelisken joq, 126-sy aıyrbaýǵa kelisti.
Páter ıeleriniń basym bóligi tozyǵy jetken úıdegi jaǵdaıdyń joqtyǵyn aıtyp, olardy tezdetip kóshirýdi suraǵan. Olardyń aıtýynsha, turǵyn úıdi jóndeýge kelispeıtin menshik ıeleri óz páterin jalǵa beredi, sondyqtan turǵyn úı jaǵdaıyn jaqsartýǵa múddeli emes.
Óz kezeginde qala ákimi turǵyndarǵa menshik ıeleriniń 100% kelisiminsiz ınvestor qonys aýdarýdy bastaı almaıtynyn túsindirdi. Munyń sheshimi retinde Erbolat Dosaev ózi qurǵan qonys aýdarý qoryn tartýdy usyndy. Eski turǵyn úıdi qaldyrýǵa kelisken azamattar qordyń páterlerine birtindep qonystana bastaıdy.
«Biz kúrdeli qurylys kásiporny arqyly tozyǵy jetken úılerdi bosatýdy bastaımyz. Sizderdiń jaǵdaı jasalǵan jańa turǵyn úıge qonys aýdarǵandaryńyzdy qalaımyn, óıtkeni men osyndaı páterlerge barǵan kezde ákim retinde júregim aýyrady», - dedi qala basshysy.
Turǵyndar ákimge turǵyndar mańaılarynda zańsyz salynǵan monsha, baý-baqsha, basseın, garajy bar eski úıler týraly aıtty.
Megapolıs basshysy qala qurylysyn baqylaý basqarmasyna ruqsatsyz salynǵan ǵımarattardy tekserýdi tapsyrdy. Sonymen qatar, kezdesýde turǵyndar kótergen barlyq másele zań aıasynda sheshiletinin jetkizdi.
Eski turǵyn úıdi jańasyna aýystyrǵan qala turǵyndary qala ákimine alǵys bildirdi.
«Eski úıler qorqynyshty, ómir súrýge kelmeıtindeı jaǵdaıda edi. Qazir bizde jańa, taza páterler bar. Men bul úıge eki jyl buryn qonystandym, biz óte qýanyshtymyz», - dedi jańa úı turǵyny.
Erbolat Dosaev aýdan ákimdigine jańa úılerdiń aýmaǵyn abattandyrý men kógaldandyrýdy baqylaýdy, sondaı-aq turaq oryndaryn qarastyrýdy júktedi.
Megapolıs basshysy jaıly qalalyq orta qurý – ákimdik jumysynyń basty baǵyttarynyń biri, al eski turǵyn úı máselesi Túrksib aýdanyndaǵy eń ózekti máseleniń biri ekenin tilge tıek etti.
Aıta keteıik, Túrksib aýdanynda kóppáterli turǵyn úı qorynda 1247 úıdi bar, jóndeýdi qajet etetin eski úılerdiń sany 586.
Sondaı-aq Túrksib aýdanyna qarasty Shýaqty shaǵyn aýdanynda ınjenerlik kommýnıkatsııaǵa qatysty qordalanǵan másele tolyq sheshildi.
Túrksib aýdanynyń ákimi Baqytjan Aqjarov qala basshysyna Shýaqty shaǵyn aýdanynda ınjenerlik ınfraqurylymqa qatysty uzaq jylǵy máseleni sheshý týraly baıandady.
Shaǵyn aýdanda elektrmen jabdyqtaý jelilerin salý boıynsha jobany júzege asyrý aıaqtaldy.
Bir jylǵa jeter-jetpes ýaqytta júrgizilgen 5,5 km jelini jańǵyrtý elektr qýatynyń shyǵynyn azaıtýǵa, paıdalaný shyǵyndaryn qysqartýǵa jáne 1500-den astam turǵyndy sapaly elektrmen qamtamasyz etýge múmkindik berdi.
Osy shaǵyn aýdanda uzyndyǵy 17,4 km sýmen qamtý jáne sý burý jelilerin salý jobasy júzege asyryldy, onyń ishinde 10 km – sý qubyry, 7,4 km – káriz jelisi. Joba aıasynda Aısha Bıbi, Aqtasty, Bereke, Volochaevskaıa, Dýadaq, Máıekti Saıaly, Terekti, Yrǵaıty syndy 9 kóshe qamtyldy.
Jumys júrgizgen «Melıorator» merdigerlik uıymy 2023 jyldyń maýsym aıynda joldyń eni boıynsha asfalt tósemdi tolyq qalpyna keltire otyryp, jelilerdiń qurylysyn aıaqtady.
Bul shaǵyn aýdan turǵyndaryna ortalyq sýmen qamtý jáne sý burý jelilerine qol jetkizýdi qamtamasyz etti, bul úshin qala turǵyndary qala basshysyna alǵys bildirdi.
Sonymen qatar, Volochaevskaıa kóshesiniń káriz aǵyny úshin qajetti eńis joq shaǵyn ýchaskesinde káriz-sorǵy qurylysyn salý jobasy ázirlenip jatyr. Áleýmettik jaýapkershilik aıasynda jobalaýshy jumysty tegin júrgizedi. Memlekettik saraptama shamamen 2024 jylǵy maýsym aıynda shyǵady.
Sondaı-aq, Erbolat Dosaev Shýaqty shaǵyn aýdanyndaǵy kóshkinderdiń aldyn alý josparymen tanysty.
Qala basshysy birinshi kezekte turǵyndardyń qaýipsizdigin qamtamasyz etýdi, onyń ishinde qajet bolǵan jaǵdaıda eńistiń shetindegi úılerdi satyp alýdy tapsyrdy. Ári megapolıs ákimi shaǵyn aýdanda nóser kárizin salý qajettigin atap ótti.
Qala basshysy gıdrogeologııalyq zertteýler júrgizýge jáne ózen arnasynyń negizin nyǵaıtýǵa nusqaý berdi.
