Eski turǵyn úı máselesin sheshý: bıyl 3 myń adam kóshirilmek
ASTANA.KAZINFORM — Ónerkásip jáne qurylys mınıstrligi elimizdegi renovatsııa jumysyn túsindirdi.
Qazaqstan Respýblıkasynyń Qurylys kodeksinde renovatsııalaý uǵymyn, jergilikti atqarýshy organdardyń quzyretin, sondaı-aq jeke ınvestorlardyń qatysý tártibin jáne úlestik qurylys arqyly apatty ári eski turǵyn úılerdi jańartý tetigin qoldanýdy naqtylaýǵa baǵyttalǵan birqatar túzetý qabyldandy. Salalyq qujattarǵa, ıaǵnı «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly», «Turǵyn úı qatynastary týraly», «Turǵyn úı qurylysyna úlestik qatysý týraly» zańdarǵa túzetýler engizildi.
- Joǵaryda kórsetilgen zańnama talaptaryn oryndaý úshin, ýaqytsha turǵyn úı berý jáne ótemaqylar máselelerin, sondaı-aq jańa obektileridegi úlesterdi esepke alý jáne kepilge qoıý tártibin reglamentteıtin zańǵa táýeldi normatıvtik-quqyqtyq aktiler qabyldandy. Atalǵan ózgerister apatty jáne tozyǵy jetken menshik ıelerin jańa turǵyn úımen qamtamasyz etý jónindegi jumysty retke keltirýge jáne renovatsııalaýdyń biryńǵaı quqyqtyq tetigin qamtamasyz etýge baǵyttalǵan. Sonymen qatar, 2025 jyly jergilikti atqarýshy organdar atalǵan turǵyn úıdi buzý arqyly 2029 jylǵa deıin apatty jáne eski turǵyn úı ıelerin jańa baspanamen qamtamasyz etý jónindegi Jol kartasyn qaıta bekitti. Jol kartasyna sáıkes osy jyly shamamen 3 000 azamatty kóshirý josparlanǵan, - delingen mınıstrliktiń Kazinform agenttigine bergen jaýabynda.
Turǵyn úı qoryn renovatsııalaý baǵdarlamasy eń aldymen apatty úılerden turǵyndardy kóshirýdi qamtamasyz etýdi, atalǵan apatty úılerdi buzý jáne bólshekteý jónindegi is-sharalardy JAO apatty úılerdiń turǵyndaryn kóshirý kezeńi aıaqtalǵannan keıin (jergilikti bıýdjet qarajaty esebinen qarjylandyrý jáne apatty úılerdiń turǵyndaryna menshik quqyǵy toqtatylǵan jaǵdaıda) júzege asyrady.
- Mınıstrlik jalǵyz turǵyn úıi apatty dep tanylǵan azamattarǵa kommýnaldyq turǵyn úı qorynan turǵyn úı berýdiń jáne bólýdiń jekelegen qaǵıdalaryn ázirledi. Qaǵıda osy jyldyń 8 qyrkúıeginen bastap kúshine endi. Endi ákimdikter jergilikti bıýdjet esebinen «Qazaqstan Respýblıkasynyń zańnamasynda belgilengen tártippen jalǵyz turǵyn úıi apatty dep tanylǵan Qazaqstan Respýblıkasynyń azamattary» sanatyndaǵy adamdar úshin jalǵa beriletin turǵyn úıdi salyp nemese satyp alyp, ony turǵyn úı komıssııasy negizinde derbes bóle alady, - dep atalyp ótken vedomstvo aqparatynda.
Aıta keteıik, buǵan deıin apatty jaǵdaıdaǵy úılerdiń kóbi qaı óńirde ekenin jazǵan edik.
