Eski talappen ashylǵan balabaqshalar jańa lıtsenzııalaýǵa daıyn ba
PETROPAVL. KAZINFORM – Jekemenshik balabaqsha ıeleri jańa lıtsenzııalaý talaptarynyń qataldyǵyna alańdaýshylyq bildirip, keıbir uıymdardyń jabylyp qalý qaýpi bar ekenin aıtyp otyr.
Bul másele Soltústik Qazaqstan oblysy Kásipkerler palatasynyń óńirlik keńesiniń otyrysynda kóterildi. Jıynda Qyzmet kórsetý salalyq keńesiniń tóraǵasy Olga Jarkova bıyl jyl basynan beri keńestiń 10 otyrysy ótip, onda mektepke deıingi bilim berý salasyndaǵy júıeli máseleler talqylanǵanyn aıtty.
Talqyǵa túsken máseleniń biri - mektepke deıingi tárbıe men oqytý qyzmetin kórsetetin barlyq uıymdarǵa lıtsenzııalaý tártibiniń engizilýi. Bul jańashyldyq 2027 jylǵy 1 qańtardan bastap memlekettik jáne jekemenshik balabaqshalarda júzege asa bastaıdy. Nátıjesinde mamandardyń biligi, qaýipsizdik, sanıtarııalyq norma, as máziri syndy jumys sapasynyń negizgi kórsetkishteri eskeriledi.
Oblystaǵy balabaqshalardyń birqatary 2009-2015 jyldary sol kezdegi normatıvterge sáıkes ashylǵan. Buǵan qosa, kásipkerler qarjylandyrýdyń naqty shyǵyndardy ótemeıtinin jáne ınklıýzıvti bilim berýge qajetti mamandardyń jetispeıtinin aıtady.
- Jekemenshik balabaqshalar da memlekettik mektepke deıingi uıymdarmen birdeı tártippen lıtsenzııalaýdan ótýi kerek. Bul rásim 2027-2029 jyldar aralyǵynda júrgiziledi dep josparlanǵan. Alaıda oǵan qalaı daıyndalatynymyzdy ázirge bilmeımiz. Sebebi lıtsenzııalaýdyń jańa talaptary qoldanystaǵy normatıvterge negizdelgen, al biz balabaqshalardy burynǵy erejelerge sáıkes ashqanbyz. Bul talaptardyń is júzinde qalaı qoldanylatyny ázirge túsiniksiz, - deıdi Olga Jarkova.
Kásipkerlerdi alańdatatyn basty máselelerdiń biri - jan basyna shaqqandaǵy qarjylandyrý ádistemesi. Qoldanystaǵy esepteý júıesinde ortasha kórsetkishter negizge alynǵandyqtan, shaǵyn jekemenshik balabaqshalardyń naqty shyǵyndary tolyq eskerilmeıdi. Ásirese qyzmetkerlerdiń eńbekaqy qoryna jumsalatyn qarajat pen bólinetin qarjynyń arasyndaǵy aıyrmashylyq kásipkerlerge salmaq túsirip otyr.
Sonyń saldarynan balabaqshalar bilikti mamandardy ustap qalýda jáne mekemeniń qarjylyq turaqtylyǵyn saqtaýda qıyndyq kóredi.
Taǵy bir túıtkil - erekshe bilim berý qajettiligi bar balalarmen jumys. Mundaı balalardy oqytý men tárbıeleý úshin tıýtorlar jáne basqa da beıindi mamandar qajet. Alaıda kadr tapshylyǵy men ınklıýzıvti toptardy uıymdastyrýdaǵy qıyndyqtar jekemenshik balabaqshalardyń múmkindigin shektep otyr.
Onyń aıtýynsha, kásipkerler kótergen máselelerdi sheshý úshin Óńirlik kásipkerler palatasymen birlesken jumys júrgizip jatyr. Usynystar jergilikti deńgeıde de, respýblıkalyq deńgeıde de qarastyrylmaq.
Buǵan deıin elimizde balany bir balabaqshadan ekinshisine aýystyrýdyń jańa memlekettik qyzmetin engizý máselesi qarastyrylyp jatqanyn jazǵan edik.