Eski poıyzdarǵa ınternet ornatyla ma — mınıstrlik jaýap berdi

ASTANA. KAZINFORM — QR TsDIAÓM Telekommýnıkatsııalar komıtetiniń tóraǵasy Damır Seısembekov Qazaqstan poıyzdaryna qashan ınternet qosylatynyn aıtty.

Bıyl qańtar aıynda Astana-Almaty baǵyty boıynsha júretin poıyzda jolaýshylarǵa arnalǵan spýtnıktik ınternet iske qosyldy. Ázirge bul ınterneti bar jalǵyz baǵyt.

— Qazir bul vagondarda testileý kezeńi júrip jatyr, jalpy alǵanda jolaýshylardyń pikiri jaqsy. Naqty merzimder týraly qate aqparat bergim kelmeıdi, biraq tehnıkalyq pılottyq joba alǵashqy jartyjyldyqta aıaqtalady dep oılaımyn, óıtkeni bul áli synaq jobasy. Bizde ınternet qyzmetin usynatyn provaıder bar, al pılottyq joba aıaqtalǵan soń, onyń ekonomıkalyq tıimdiligin eskerý qajet. Jańa júıeni engizý kezeń-kezeńimen júzege asady, eń aldymen jolaýshylar aǵyny kóp baǵyttarda ornatylady. Bizde keıbir poıyzdar múldem mobıldi baılanysy joq marshrýttarmen júredi, sondyqtan aldymen sol baǵyttarda ınternet júrgiziledi, — dedi Damır Seısembekov Úkimettegi brıfıngte.

Onyń aıtýynsha, ınternet tek «Talgo» úlgisindegi poıyzdarda ǵana qoljetimdi bolady.

— QTJ málimetinshe, elimizde shamamen 16 baǵytta «Talgo» poıyzdary júredi. Tehnıkalyq turǵydan alǵanda, dál osy poıyzdar ishinde ınternet taratý múmkindigi bar. Al eski, keńes dáýirinen qalǵan poıyzdarǵa bul júıeni engizý múmkin emes. Sondyqtan qazir biz QTJ-men birlesip, barlyq 16 baǵytta tolyqqandy ınternetpen qamtý josparyn ázirlep jatyrmyz, — dep tolyqtyrdy spıker.

Eske sala keteıik, buǵan deıin jolaýshylar poıyzdaryn jańartý deńgeıi qalaı júrgizilip jatqany týraly jazǵan bolatynbyz.