Eski qurylystardyń ornyna qoǵamdyq keńistik: «Artem» mańyndaǵy aýmaq ózgerdi
ASTANA. KAZINFORM — Astanada qalalyq ortany abattandyrý boıynsha aýqymdy jumys júrip jatyr. Bıyl elordada 173 qoǵamdyq jáne aýla keńistigin jańartý josparlanǵan, dep habarlaıdy elorda ákimdiginiń resmı saıty.
Qala turǵyndaryna jaqsy tanys bazar men «Astanalyq» («Artem») saýda úıiniń mańynda da eleýli ózgerister boldy. Bul — elorda turǵyndary kóp jınalatyn oryndardyń biri. Osydan birneshe jyl buryn mundaǵy aýmaq múlde basqasha kórinetin: eski bir qabatty qurylystar, jasyl jelek az jáne turǵyndarǵa jaıly demalys orny is júzinde bolmaǵan.
Búginde eski qurylystardyń ornyna jaıly qoǵamdyq keńistik ashyldy. Qurylys nysandary buzylǵannan keıin aýmaǵy kógaldandyryldy. Munda aǵashtar men kópjyldyq ósimdikter otyrǵyzylyp, jaıaý júrginshilerge arnalǵan joldar men demalys oryndary abattandyryldy.
Búginde «Astanalyq» («Artem») mańyndaǵy aýmaq saýda nysandary men kósheler arasyndaǵy bos keńistik qana emes, kógaldandyrylyp, turǵyndarǵa jaıly jaǵdaı jasalǵan abattandyrylǵan qoǵamdyq orynǵa aınaldy.
Mundaı jobalar elordanyń kelbetin birtindep ózgertip, buryn paıdalanylmaǵan nemese turǵyndar úshin qolaısyz bolǵan aýmaqtardy qaıta jandandyryp keledi.
Abattandyrý jumystary barysynda kógaldandyrýǵa, jaıaý júrginshilerge qolaıly baǵyttar qalyptastyrýǵa jáne turǵyndardyń qala ishinde jaıly ýaqyt ótkizýine múmkindik beretin oryndar qurýǵa erekshe mán beriledi.
Eske sala keteıik, abattandyrý jumysy elordanyń barlyq alty aýdanynda júrgizilip jatyr. Sońǵy jyldary Astanada shamamen 500 qoǵamdyq jáne aýla keńistigi abattandyryldy.
Buǵan deıin Astanada 1,7 mln sharshy metrden astam turǵyn úı súriletini belgili boldy.
