Esik kólindegi bóget memleket menshigine qaıtarylady
QONAEV. KAZINFORM – Almaty oblysynyń ákimdigi Esik kólindegi bógetti senimgerlik basqarýǵa alǵan «Habel» JShS-men jasalǵan shartty buzdy. Buǵan ınvestordyń nysandy qaýipsiz paıdalaný jáne jańǵyrtý boıynsha mindettemelerin oryndamaýy sebep bolǵan.
Bul týraly Almaty oblysy ákiminiń baspasóz qyzmeti habarlady. Esik kólindegi bóget pen oǵan irgeles 140 gektardan astam aýmaq strategııalyq mańyzy bar gıdrotehnıkalyq nysan sanalady. Nysan uzaq jyldar boıy kúrdeli jańǵyrtý men qalpyna keltirý jumystaryn qajet etip kelgen.
2024 jyldyń sońynda ashyq tender qorytyndysy boıynsha bóget pen oǵan irgeles aýmaq satyp alý quqyǵynsyz 49 jyl merzimge «Habel» JShS-na senimgerlik basqarýǵa berilgen.
Joba aıasynda ınvestor bógetke kópfaktorly zertteý júrgizip, gıdrotehnıkalyq qurylysty rekonstrýktsııalaý, monıtorıng jáne qaýipsizdik júıelerin engizý, tazartý jumystaryn atqarý jáne týrıstik ınfraqurylymdy damytýy tıis bolǵan.
Ákimdik málimetinshe, birinshi kezeńdegi negizgi mindetterdiń biri sel qaýpiniń aldyn alyp, jaqyn mańdaǵy eldi mekenderdiń qaýipsizdigin qamtamasyz etý edi. Alaıda júrgizilgen tekserý nátıjesinde shart talaptarynyń oryndalmaǵany anyqtalǵan.
– Senimgerlik basqarýshy naqty ınvestıtsııalyq jáne paıdalaný mindettemelerin óz moınyna alǵanymen, kózdelgen jumystardyń edáýir bóligi oryndalmaǵan. Zańbuzýshylyqtar anyqtalǵannan keıin sotqa deıin retteý rásimderi júrgizilip, kemshilikterdi joıýǵa ýaqyt berildi. Soǵan qaramastan mindettemeler oryndalmaǵandyqtan shart birjaqty tártippen toqtatyldy, – delingen habarlamada.
Joba boıynsha alǵashqy jyly 245 mln teńge ınvestıtsııa salý josparlanǵan. Alaıda naqty salynǵan qarjy kólemi 11,4 mln teńgeni qurap, jospardyń 5 paıyzyna da jetpegen.
Sonymen qatar josparlanǵan jumys oryndary ashylmaǵan. 2025 jyldyń qarashasyna deıin daıyndalýy tıis bógetti kópfaktorly zertteý qorytyndysy da belgilengen merzimde tapsyrylmaǵan. Mindetti jyldyq esep te usynylmaǵan.
Ákimdik jarııalanǵan kólemde naqty qyzmettiń júzege aspaýy saldarynan bıýdjetke túsýi tıis salyq pen ózge de kirister tolyq kólemde túspegenin atap ótti.
Qazir nysandy memleket menshigine qaıtarý jumystary júrgizilip jatyr. Aldaǵy sheshimder qaýipsizdik talaptary men memlekettik múddelerdi eskere otyryp qabyldanady.
Aıta keteıik, endi Almaty mańyndaǵy «Barys» avtobazary memleketke tolyq qaıtarylýy múmkin.
