Eski kólikterdi ýtılızatsııalaý baǵdarlamasy qashan qaıta iske qosylady
ASTANA. KAZINFORM — Qazir «Jasyl damý» AQ kólikterdi ýtılızatsııalaýmen aınalysatyn kompanııalarmen kelissózder júrgizip, baǵdarlamany iske asyrý qaǵıdalaryn qaıta qarap jatyr, dep habarlaıdy Kazinform agenttiginiń tilshisi.
Bul týraly «Jasyl damý» basqarma tóraǵasynyń orynbasary Darhan Daýtov OKQ-da ótken brıfıngte málimdedi. Onyń aıtýynsha, jańa tetikter buryn anyqtalǵan zańbuzýshylyqtardy eskere otyryp ázirlenip jatyr. Bul deldaldyq jáne sybaılas jemqorlyq shemalaryna jol bermeý úshin qajet. Jańartylǵan baǵdarlamanyń negizgi qaǵıdaty — kóligin ýtılızatsııaǵa tapsyrǵan jeke tulǵalardy, ıaǵnı kólik ıelerin tikeleı paıda alýshy etý.
— Qazirgi ýaqytta qaǵıdalar bar, alaıda biz olardy jetildirý jumystaryn jalǵastyryp jatyrmyz. Basty maqsat — sybaılas jemqorlyqqa qatysty kez kelgen táýekeldi boldyrmaý. Qazir ýtılızatsııamen aınalysatyn kompanııalarmen kelissózder júrgizip jatyrmyz. Kelissózder aıaqtalyp, qaǵıdalar tolyqtyrylyp bolǵan soń, bul aqparat buqaralyq aqparat quraldarynda jarııalanady, — dedi Darhan Daýtov.
Ol 2016 jyldan bastap paıdalanýdan shyqqan avtokólikter men aýyl sharýashylyǵy tehnıkasyn jınaý, tasymaldaý, qaıta óńdeý jáne ýtılızatsııalaý jumystarymen «Recycle Company» JShS aınalysqanyn eske saldy.
2022 jyldyń basynda kompanııanyń burynǵy keıbir qyzmetkerlerine qatysty tıisti qyzmetterdiń tarıfteriniń negizdiligine baılanysty sotqa deıingi tergeý bastalǵan. Tergeý qorytyndysy boıynsha aıyptaý úkimi shyǵarylyp, zańdy kúshine engen.
Atap aıtqanda, jalǵan qujattardy paıdalanyp, bir kólikti ártúrli avtokólik retinde birneshe ret ýtılızatsııaǵa tapsyrý derekteri anyqtalǵan. Sonymen qatar deldaldar máselesi de bolǵan: bir adamnyń ýtılızatsııaǵa 1 700-den astam kólik tapsyrǵany belgili boldy.
2022 jyldyń basynan bastap ÓKM operatory bolyp «Jasyl damý» AQ belgilendi.
Osydan buryn Atyraý oblysynyń kommýnaldyq menshigindegi tozyǵy jetken 96 kólik jekeshelendirý úshin elektrondyq aýktsıonǵa shyǵarylǵanyn jazǵanbyz.
