Eski kólikter úlesi 80%: Halyqqa jańa kólik alýdyń qoljetimdi joly

ASTANA. KAZINFORM — Elimizde 5 mıllıonnan astam jeńil kólik tirkelgen. Al onyń 80 paıyzǵa jýyǵy 10 jyldan asqan kólikter.

Bul týraly QR Parlamenti Májilisiniń depýtaty Oljas Quspekov «Búgin LIVE» baǵdarlamasyna bergen onlaın suhbatynda habarlady.

— Olardyń barlyǵy eski kólikter. Alaıda jańa kólik satyp alýǵa halyqtyń múmkindigi tómen. Sondyqtan, lızıngti avtonesıemen básekelestirip, naryqta tómen baǵamen qoljetimdi etip, kólik alý múmkindigin ashý kózdelgen edi, — deıdi ol.

Depýtat avtonesıe men lızıngtiń aıyrmasyn túsindirdi.

— Avtokredıt arqyly kólik alǵan jaǵdaıda, ártúrli ekonomıkalyq sebepterge baılanysty satyp alýshy nesıesin tóleı almaı qalsa, onyń esepshottary buǵattalyp, kredıttik tarıhy buzylady. Al lızıngte mundaı jaǵdaı bolmaıdy. Eger aı saıynǵy tólemdi tóleı almasa, kólikti jalǵa berýshi kompanııa ony keri alyp qoıady. Al satyp alýshy kólikti qaıta jalǵastyryp alǵysy kelse, tólemniń ne úshin tólenbeı qalǵanyn túsindirip, kompanııamen ózara kelisim jasaýy múmkin, — deıdi Oljas Quspekov.

Al avtolızıng alý úshin kóliktiń túrine qatysty eshqandaı shekteý joq.

— Tek bir ǵana talap bar. Lızıngke beriletin kólik mindetti túrde jańa bolýy qajet. Qoldanysta bolǵan kólik lızıng arqyly satylmaıdy. Al bolashaqta lızıngke berilip, paıdalaný barysynda tólemi jasalmaı qaıtarylǵan kólik bolsa, onyń tehnıkalyq jaǵdaıy durys bolǵan jaǵdaıda ǵana qaıtadan lızıngke qoıýǵa ruqsat etiledi, — deıdi spıker.

Avtolızıngke beriletin kóliktiń paıyzdyq mólsherlemesi 15 paıyzdan aspaıdy.

— Negizgi kórsetkishterdi memleket rettedi. Bul jerde, árıne, naryqtyq mehanızm jumys isteýi kerek. Saýda jáne ıntegratsııa mınıstri mólsherlemeni 45 paıyz deńgeıinde bekitip jatsa, Ónerkásip jáne qurylys mınıstrligi ony 36 paıyzdan asyrmaý jóninde shekteý qoıdy. Ótken aptada biz ekinshi deńgeıli banktermen, avtolızıng kompanııalarymen jáne avtosalondarmen kezdesý ótkizdik. Sol jerde 36 paıyzdyń ózi halyq úshin óte úlken júkteme bolatynyn aıtyp, bul mólsherleme 10-15 paıyz deńgeıinde ǵana bolýy qajet degen usynysymyzdy jetkizdik. Sonymen qatar, baǵasy 10 mıllıon teńgege deıingi kólikter birinshi deńgeıge engizilýi kerek degen usynys jasadyq. Bul bastamalar naryq tarapynan qoldaý tapty. Nátıjesinde, búginde lızıngke beriletin kólikterdiń paıyzdyq mólsherlemesi 15 paıyzdan aspaıtyn bolyp bekitildi, — deıdi Májilis depýtaty.

Aıta keteıik, Qazaqstanda jeke tulǵalarǵa kólikti lızıng arqyly berý tetigi engizilip jatyr.