Eski kólikti ýtılızatsııaǵa qalaı tapsyryp, ótemaqy alýǵa bolady
PETROPAVL. KAZINFORM — Tozyǵy jetken avtomobıl men aýyl sharýashylyǵy tehnıkasynyń ıeleri 2 mln teńgege deıin jeńildik sertıfıkatyn ala alady.
Ekologııa jáne tabıǵı resýrstar mınıstrligi eski kólikterdi joıýǵa qabyldaý memlekettik baǵdarlamasynyń ózekti tustaryn túsindirdi.
Tártip boıynsha, eskirip, qoldanystan shyqqan kólikter jáne ózdiginen júretin aýyl sharýashylyǵy tehnıkalaryn joıýdy, baǵdarlama operatory — «Jasyl damý»AQ shart jasasý nátıjesinde qaıta óńdeýshiler jelisi júrgizedi.
Baǵdarlamaǵa qatysý úshin eki kezeńnen ótý qajet:
— Qujattardy (pasport, tirkeý týraly kýálik, tekserý aktisi) qosa bere otyryp, «Jasyl damý» AQ platformasynda onlaın-ótinim berý.
— Bólshekteriniń tolyq bolýyn jáne derekterin teksergennen keıin qabyldaý pýnktinde tehnıkany jeke tapsyrý.
Baǵdarlama arqyly kez kelgen jylǵy jáne modeldegi kólikterdi tapsyrýǵa bolady. Biraq jıyntyq talaptary bar, mysaly, qozǵaltqyshtyń, korpýstyń jáne shassıdiń bolýy shart. Bul durys óńdeýdi qamtamasyz etý jáne ótemaqy alý úshin mańyzdy.
— Kólikti joıý úshin ıelerine «Jasyl damý» AQ aqparattyq júıesi arqyly ótinim berý qajet. Ótinim avtokólikti nemese arnaıy tehnıkany joıý quqyǵyn rastaıtyn qujattarmen qosa beriledi, — deıdi QR Ekologııa jáne tabıǵı resýrstar mınıstrliginiń ókilderi.
Eski avtomobılder men aýylsharýashylyq tehnıkalaryn qabyldaý pýnktteriniń tolyq tizimi, sondaı-aq olardyń ornalasqan jeri operatordyń resmı saıtynda jarııalanady.
Qaı kezde kólik joıýǵa qabyldanbaýy múmkin?
Operator tehnıkany qabyldaýdan bas tartýy múmkin, eger:
— Qujattar tolyq usynylmasa;
— Kólik quraly tirkeýden shyǵarylmasa;
— Ótinimdi ókilettigi joq úshinshi tulǵa berse;
— Tehnıkanyń bólshekteri talapqa saı tolyq bolmasa;
— Qujattardaǵy derekter memlekettik tirkeýdiń biryńǵaı aqparattyq júıesindegi aqparatpen sáıkes kelmese.
— Bekitilgen tártipte shaǵymdanýdyń jeke tetigi qarastyrylmaǵan, biraq ótinish berýshiler kelispegen jaǵdaıda QR Ákimshilik rásimdik-protsestik kodeksinde kózdelgen tártippen sotqa júginýge quqyly, — deıdi vedomstvodaǵylar.
Jeńildikter men ótemaqylar
Avtokólik pen arnaıy tehnıkanyń ıelerine jańa kólik quralyn satyp alǵan kezde paıdalanýǵa bolatyn jeńildik sertıfıkattary beriledi.
Baǵdarlama aıasynda aqshalaı tólem júrgizilmeıdi. Al jeńildik mólsheri kólik sanatyna baılanysty.
Mysaly, jeńil avtomobılderge jeńildik — 315 myń teńge, avtobýstarǵa — 750 myń teńgege deıin, al aýyl sharýashylyǵy tehnıkasyna jıyntyǵyna baılanysty 560 myń teńgeden 2 mln teńgege deıin.
— Jeńil avtomobılder (M1) — 315 000 tg
— Jolaýshy kólikteri:
5 tonnaǵa deıin (M2) — 550 000 tg
5 tonnadan astam (M3) — 750 000 tg
— Júk kólikteri:
3,5 tonnaǵa deıin (N1) — 550 000 tg
3,5-ten 12 tonnaǵa deıin (N2) — 550 000 tg
12 tonnadan astam (N3) — 750 000 tg
Aýyl sharýashylyǵy tehnıkasy:
— Traktorlar:
1 jıyntyq boıynsha — 1 000 000 tg
2 jıyntyq boıynsha — 560 000 tg
— Kombaındar:
1 jıyntyq boıynsha — 2 000 000 tg
2 jıyntyq boıynsha — 1 500 000 tg
Tehnıkany joıý úshin qaıda tapsyrýǵa bolady?
Buryn tehnıkany joıýmen «Recycling Company» JShS (Qaraǵandy) jáne «Autorecycling» JShS-men (Qostanaı) kelisimshart jasasqan «Operator ROP» JShS jeke kompanııasy aınalysqan.
«Jasyl damý» AQ qaıta óńdeýshilermen jańa sharttar jasasqannan keıin qabyldaý pýnktteriniń tizimin qaıta berýge ýáde beredi. Shymkenttegi avtokólikti joıýmen aınalysatyn kásiporynnyń qazirgi jaǵdaıy boıynsha vedomstvo derekterdiń joqtyǵyn alǵa tartyp, aqparat berilmedi.
Kólikterdi joıý baǵdarlamasynyń nátıjesi
2023-2024 jyldary 218 myńnan astam kólik qabyldandy jáne qaıta óńdeldi, onyń ishinde 198 myńǵa jýyq avtomobıl men arnaıy tehnıka joıyldy.
— Metall synyqtary men ishinen alynǵan komponentter qaldyqtardy óńdeýge lıtsenzııasy bolýy mindetti qaıta óńdeýshilerge beriledi. Paıdaly materıaldar jańa ónim óndirýge jiberiledi, bul ekologııaǵa júktemeni azaıtýǵa jáne resýrstardy qaıta óńdeýdi jaqsartýǵa yqpal etedi, — deıdi Ekologııa mınıstrliginiń mamandary.
Buǵan deıin eldegi polıgondarda 125 mln tonna qoqystyń jatqanyn jazǵan edik.