Eski kólik salyǵy 50%-ǵa tómendeıdi – jańa Salyq kodeksi jobasy

ASTANA. KAZINFORM – Jańa Salyq kodeksinde BJZQ-dan jasalatyn zeınetaqy tólemderin jeke tabys salyǵynan bosatý jónindegi norma kózdelgen. Bul týraly QR UEM Salyq jáne keden saıasaty departamentiniń dırektory Erlan Saǵynaev málimdedi. 

«Memleket basshysynyń tapsyrmalaryn oryndaýmen qatar, qoǵam jıi kóteretin máseleler sheshiledi. Máselen, jańa Salyq kodeksinde BJZQ-dan zeınetaqy tólemderin jeke tabys salyǵynan bosatý jónindegi norma kózdelgen. Sondaı-aq qoldanýy 10 jyldan asqan avtomobılder úshin salyq somasy 30%-ǵa, 20 jyldan asqan avtomobılder úshin – 50%-ǵa tómendetiletin bolady», - dedi departament basshysy Ulttyq kásipkerler palatasynyń sezaldy jıynynda. 

Sonymen qatar «Sán-saltanat» zattaryna joǵary salyq salý jónindegi mindetterdi iske asyrý úshin de usynystar qarastyrylǵan. 

«Jıyntyq quny 450 mıllıon teńgeden asatyn jyljymaıtyn múlik obektileri boıynsha múlik salyǵynyń joǵary mólsherlemesin belgileý; kedendik quny 75 mıllıon teńgeden asatyn jeńil avtomobılderge aktsızben qosymsha salyq salý; qymbat alkogol jáne temeki ónimderine, qymbat teńiz kemelerine, ushý apparattaryna aktsızben qosymsha salyq salý usynystary engizilgen», - dedi jańa Salyq kodeksiniń jobasy jaıly aıtqan Erlan Saǵynaev.

Eske sala keteıik, búgin Astanada Ulttyq kásipkerler palatasynyń XII Sezi ótti. Ortalyq memlekettik organ vıtse-mınıstrleriniń, QMA, Antıkor, Bas Prokýratýranyń basshylyq quramdary jáne «QazAgroQarjy» AQ, «Báıterek» UBH AQ, «Samuryq-Qazyna» AQ jáne basqa da jetekshi damý ınstıtýttarynyń qatysýymen ótken sharaǵa elimizdiń túkpir-túkpirinen 360-tan astam delegat jáne 180-deı bıznes-qaýymdastyq jınaldy. Jıynda keıingi birneshe aıda kásipkerlerden kelip túsken suraqtar talqylandy. 

Buǵan deıin jańa Salyq kodeksinde tólemder sanyn 77-ge azaıtyp, 6 alym túrin qysqartý qarastyrylǵanyn jazǵan edik. 

Sondaı-aq jańa salyq kodeksinde Investıtsııalar úshin «ámbebap» yntalandyrý tetigi qarastyrylǵany habarlanǵan.