Eski kólik salyǵy 50%-ǵa tómendeıdi: jańa norma keler jyly kúshine enedi

ASTANA. KAZINFORM — Qarjy vıtse-mınıstri Erjan Birjanov eski kólikterdiń salyǵyn azaıtý normasy 2026 jyldyń qańtarynan kúshine enetinin aıtty.

Onyń sózine qaraǵanda, búgin Parlament Májilisi ekinshi oqylymda qabyldaǵan jańa Salyq kodeksinde eski kólikterge salyq júktemesin azaıtý normasy saqtalǵan.

— Jańa norma boıynsha avtokólikti paıdalaný merzimi 20 jyldan assa, onda 50 paıyz jeńildik qarastyrylady. Eger avtokólik 10 jyldan beri qoldanylyp kelgen kólik bolsa, 30 paıyz shegerim qarastyrylǵan. Bul norma 2026 jyldyń 1 qańtarynan bastap kúshine enedi, — dedi E. Birjanov Májilistiń jalpy otyrysynan keıin tilshiler suraǵyna jaýap bere otyryp.

Aıta keteıik, Búgin Májilis Salyq kodeksi men oǵan ilespe zańdy ekinshi oqylymda qaralyp, qabyldady. Májilis tóraǵasy Erlan Qoshanov qabyldanǵan jańa Salyq kodeksine qatysty pikir aıtty.

Eske salsaq, byltyr quny 1 mln dollardan asqan jyljymaıtyn múlikke salyq mólsherlemesi ósetinin jazǵan edik.