Eski bazarlardy jańǵyrtý jumysy nelikten keshigip jatyr

ASTANA. KAZINFORM – Búginde elimizde resmı málimet boıynsha 644 bazar bar, bıyl sonyń ishinde 100 bazar qaıta jańartylady.

— Bazarlardy jańǵyrtý máselesi mınıstrliktiń erekshe baqylaýynda, bul jumys 10 jyl buryn bastalǵan. 2015 jyly saýda qyzmetin retteý týraly zańǵa túzetýler engizilip, oǵan sáıkes ashyq bazar ıelerin 2020 jylǵa qaraı shynydan jáne betonnan jasalǵan ǵımarattarǵa kóshýin mindettedi. Degenmen qymbatshylyqqa jáne pandemııaǵa baılanysty bul jumys keıinge shegerildi. Bazarlardy jańǵyrý oblystar úshin 2025 jylǵa deıin, al Astana, Almaty jáne Shymkent qalalary úshin 2023 jylǵa deıingi merzimde bekitildi, — dedi Saýda jáne ıntegratsııa mınıstrligi saýda komıtetiniń tóraǵasy Aıdar Ábildabekov Ortalyq kommýnıkatsııalar qyzmeti alańynda ótken baspasóz máslıhatynda. 

Degenmen Saýda komıteti tóraǵasynyń aıtýynsha, ákimdikter tarapynan baqylaýdyń jetkiliksizdiginen, pandemııa kezinde qurylys materıaldarynyń qymbattaýy sekildi birqatar obektıvti sebepterge baılanysty bazarlardy jańǵyrtý jumystary ýaqtyly aıaqtalmaǵan. 

— Saldarynan bazarlardy jańǵyrtý merzimi eki ret aýystyryldy (2018, 2021 jyldar), — deıdi spıker. 

Ulttyq statıstıka bıýrosynyń málimetine sáıkes elimizde 644 bazar bar. (412 ámbebap bazar, 232 mamandandyrylǵan bazar) Onyń ishinde jańǵyrtylǵan bazarlar sany: 

— 2021 jylǵa deıin — 84 bazar;
— 2021 jyly — 4 bazar;
— 2022 jyly — 33 bazar;
— 2023 jyly — 19 bazar;
— 2024 jyly — 16 bazar.

Aıta keteıik, bıyl elimizde 100 bazar jańartylady.  Aldymen Saýda jáne ıntegratsııa mınıstrliginiń ókilderi barlyq bazardy aralap, tekserip shyǵady. 

Sonymen qatar 2026 jyldan bastap ýaqtyly jańartylmaǵan bazar ıelerine aıyppul salyna bastaıdy.

Sondaı-aq Saýda komıtetiniń tóraǵasy bazarlardy jańǵyrtýǵa qarjy qaıdan alynatynyn aıtty.