Eski avtokólikterge salyq 50 paıyzǵa azaıady – Qarjy mınıstrligi

ASTANA. KAZINFORM — Qarjy vıtse-mınıstri Erjan Birjanov jańa Salyq kodeksinde eski kólikterge salyq mólsherin azaıtý normasy bar ekenin aıtty.

— Árıne, jobada usynylǵan osy norma saqtaldy. Eger avtokólik 20 jyldan astam ýaqyt paıdalanylyp kelse, salyqtyń jartysyn tóleıdi. Al 10 jyldan asqan avtokólikterge salyq 30 paıyzǵa azaıady, — dep naqtylady Erjan Birjanov Májilistiń jalpy otyrysynan keıin tilshiler suraǵyna jaýap bere otyryp.

Bul turǵyda ol qazir eldi mekender men shalǵaı aýyldarda eski kólikter kóp ekenin eske saldy.

— Osy turǵyndardyń salyq júktemesin jeńildetý úshin mundaı normalardy engizip otyrmyz. Bul norma qozǵaltqysh kólemi úlken nemese shaǵyn kólikterdiń barlyǵyna qatysty. Jol talǵamaıtyn (joǵary salyq tóleıtin) kólikter de qamtylady, ıaǵnı 20 jyldan assa, 50 paıyzyn tóleıdi, — dedi vıtse-mınıstr.

Eske salsaq, byltyr kúzde jańa Salyq kodeksiniń jobasyn tanystyrylǵan edi. 

Sol kezde eski kólikterge salynatyn salyq tómendetiletini málim boldy.

Atap aıtqanda, Májilis Salyq kodeksiniń jańa jobasyn birinshi oqylymda maquldady.