Esirtkiniń zııandylyǵyn túsindirýge arnalǵan shara ótti
ASTANA. 11 maýsym. QazAqparat - Aqtóbe qalasynda oblystyq ІІD Esirtki bıznesine qarsy kúres basqarmasy, «Nur Otan» HDP, densaýlyq saqtaý men bilim berý bólimderi, mádenıet jáne sport departamenti, úkimettik emes uıymdar birigip, «Jastyq» sport kesheninde el táýelsizdiginiń 20 jyldyq mereıtoıyna oraı sporttyq shara ótkizdi.
Bul týraly Aqtóbe oblystyq ІІD baspasóz qyzmeti habarlady.
Atalmysh sharanyń basty maqsaty - óskeleń urpaqty otan súıgishtikke tárbıeleý, jasóspirimderdi esirtkiniń adam aǵzasyna zııan ekendigin túsindirý, salaýatty ómir saltyn saqtaý, balalardyń bos ýaqytyn tekke ótkizbeı sportpen shuǵyldanýyna múmkindik týǵyzý. Bir eskeretin jaıt, qazirgi tańda elimiz boıynsha esirtkige táýeldi 55 myń adam bolsa, ókinishke oraı, onyń ishinde áıelder men jasóspirimderdiń bary jasyryn emes. Jyl basynan beri Aqtóbe oblysynyń narkologııalyq dıspanserindegi arnaıy esepte 1449 nashaqor tirkelse, onyń 178-i áıelder. Ǵasyr dertine aınalyp otyrǵan nashaqorlyqpen barlyq qoǵam bolyp birige kúreskende ǵana esirtkini aýyzdyqtaýǵa bolatynyn eskergen jón.
Aqtóbe oblysynyń ІІD Esirtki bıznesine qarsy kúres basqarmasynyń ókilderi sharaǵa qatysýshylarǵa esirtkini paıdalaný óte qaýipti ekenin jáne qandaı qaterge ákep soǵatynyn tolyq baıandady. Sonymen qatar, QR ІІM Astana qalasynan basylyp shyǵatyn «Narkopost», «Esirtkisiz bolashaq» aqparattyq-nasıhattyq jýrnaldary taratyldy. Sporttyq sharaǵa jetim balalar, nashar tártibine baılanysty polıtsııa bóliminde arnaıy esepte tirkeýde turǵan kámelettik jasqa tolmaǵan jasóspirimder jáne sport sektsııalaryna qatysyp júrgen elimizdiń bolashaq sportshy balalary qatysty. Taekvondodan uıymdastyrylǵan jarysta 150 -den astam jasóspirim óz baqtaryn synap, jeńimpazdar men júldegerler arnaıy gramotalar, baǵaly syılyqtarmen marapattaldy.
