Esirtkiniń zańsyz aınalymy boıynsha 8 medıtsına qyzmetkeri ákimshilik jaýapkershilikke tartyldy
ASTANA. 29 aqpan. QazAqparat - Іshki ister mınıstrligi aǵymdaǵy jyldyń 20-24 aqpan aralyǵynda «Dopıng» jedel-aldyn alý sharasynyń 1-shi kezeńin júzege asyrdy.
Shara barysynda esirtkiniń zańsyz aınalymy boıynsha ákimshilikke 18 laýazymdy tulǵa tartylsa, sonyń 8-i medıtsına qyzmetkerleri. Bul týraly búgin Іshki ister mınıstrliginde ótken dástúrli baspasóz máslıhaty barysynda vedomstvonyń resmı ókili Nurdildá Oraz málim etti.
Sharanyń negizgi maqsaty - medıtsınalyq mekemelerde jáne óndiristik oryndarda esirtki jáne psıhotroptyq zattardyń, prekýrsorlardyń zańdy aınalymy salasyndaǵy buzýshylyqtardy anyqtaý jáne olardyń jolyn kesý. «Bul rette 624 sýbekti tekserildi. Onyń 195-i dárihanalar, 159-y qoımalar, 164-i emdeý-aldyn alý oryndary jáne 106-sy óndiristik kásiporyndar», - deıdi N. Oraz. Onyń aıtýynsha, jedel aldyn alý sharasy barysynda esirtkiniń jáne psıhotroptyq zattardyń, prekýrsorlardyń zańsyz aınalymy boıynsha 151 zań buzýshylyq anyqtalǵan. Al ondaı zattardy esepke alý, saqtaý, paıdalaný jáne ótkizý tártibin buzǵany úshin 11 qylmystyq is qozǵaldy. Ákimshilik jaýapkershilikke 18 laýazymdy tulǵa tartylsa, onyń ishinde 8-i medıtsına qyzmetkerleri bolyp otyr.
«Jedel aldyn alý sharasy barysynda esirtki dárilik jáne psıhotroptyq zattarynyń 3 myńnan asa ampýlasy jáne myńnan asa dáriler, 280 tonnadan asa prekýrsorlar (tuz jáne kúkirt qyshqyly), 2 keliden asa geroın, 45 keli marıhýana, 8,5 keliden asa gashısh alyndy», - deıdi N. Oraz.
