Esirtkini syıaqy retinde bergen jáne para alǵan polıtseıler sottaldy
ShYMKENT. QazAqparat - Ońtústik Qazaqstan oblysynda esirtkini syıaqynyń ornyna bergen jáne para alǵan polıtseıler sottaldy. Oblystyq qylmystyq ister jónindegi mamandandyrylǵan aýdanaralyq sotynda Otyrar aýdandyq ishki ister basqarmasy bastyǵynyń eki orynbasary men ýchaskelik polıtseıge qatysty sot úkimi shyqty. Bul týraly oblystyq sotta ótken brıfıngte málim boldy, dep habarlaıdy QazAqparat tilshisi.
Oblystyq qylmystyq ister jónindegi mamandandyrylǵan aýdanaralyq sotynynyń úılestirýshi sýdıasy Ábınur Qarabaevtyń sózinshe, qylmystyq is qupııa qujattar bolýyna baılanysty jabyq túrde qaralǵan.
«Otyrar aýdandyq ІІB bastyǵynyń birinshi jáne qatardaǵy orynbasaryna qatysty QR Qylmystyq kodeksiniń «Esirtki zattaryn zańsyz ótkizý» jáne «Zańsyz oq dárilerdi saqtaý», «Para alý» men «Qyzmettik ókilettiligin teris paıdalanǵan» degen baptarymen aıyptaý úkimi shyqty. Olar on jylǵa bas bostandyǵynan aıyryldy. Ýchaskelik polıtseı Qylmystyq kodekstiń «Para alý» babymen aıypty dep tanylyp, oǵan 3 mln teńge kóleminde aıyppul tóleý belgilendi»,- dedi Ábınur Qarabaev.
Sýdıanyń aıtýynsha, polıtseıler ózderine túrli qylmystar týraly jasyryn aqparat jetkizetin adamǵa syıaqy retinde esirtki bergen.
Aıta keteıik, esirtkige qatysty taǵy Abaı aýdandyq polıtsııa bóliminiń 4 ýchaskelik ınspektory men túzeý mekemesiniń bir qyzmetkeri osy tekstes qylmystary úshin sottalǵan.
«Odan bólek, Otyrar aýdandyq sotynda ishki ister basqarmasynyń aǵa tergeýshisi para alǵany, Túrkistan qalalyq sotynda ishki ister basqarmasynyń tergeýshisi sybaılas jemqorlyqqa qatysty jasaǵan qylmystyq isteri qaralýda. Sondaı-aq, oblystyq qylmystyq ister jónindegi mamandandyrylǵan aýdanaralyq sotynda Jumyspen qamtý ortalyǵy qyzmetkerlerine qatysty bolyp jatqan sot otyrysynda da bir aıyptalýshy Eńbekshi aýdandyq Jergilikti polıtsııa bóliminiń bólim bastyǵy qyzmetin atqarǵan. Onyń isi de atalǵan sotta qaralyp jatyr», - dedi oblystyq sottyń sýdıasy Tamara Smaılova.
