Esirtkimen ustalǵandardyń ishinde 18 jasar boıjetken de bar
ASTANA. QazAqparat - «Semeı» shekaralyq baqylaý otrıadynyń «Shemonaıha temirjol» bólimshesinde 7 qańtar kúni saǵat tańǵy 05.30-da shekarashylar «Lenınogor - Astana» baǵytymen ketip bara jatqan № 376 jolaýshylar poıyzyn tekserý barysynda arnaıy úıretilgen «Mıla» atty qyzmettik ıt №10 vagonnyń №4 ornynan, jastyqtyń tysyna tyǵylǵan gashısh taýyp aldy.
Oryn ıesi ustaldy, ol 41 jastaǵy qazaqstandyq bolyp shyqty, dep habarlaıdy QR UQK ShQ baspasóz qyzmeti. Ustalǵan azamat Shemonaıha temirjol beketiniń jelilik polıtsııa bólimine tapsyryldy.
Tabylǵan esirtki zatynyń kólemi men salmaǵy asa kóp emes, bar-joǵy 4,89 gramm ǵana. Degenmen, bul qazaqstandyq shekarashylardyń qyraǵylyǵyn taǵy bir kórsetse kerek.
Osy otrıadtyń «Aýyl temirjol» bólimshesinde 9 qańtarda, saǵat 09.50-de dál osy baǵyttaǵy osy nómirli poıyzdan taǵy da esirtki tasymaldaýshy ustaldy. Ol Krıstına esimdi nebári 18 jastaǵy qyz bala bolyp shyqty. Arnaıy úıretilgen ıt aınalshyqtap boıjetkenniń janynan shyqpaı qoıǵandyqtan jeke tekserý jasalyndy. Tekserý barysynda onyń ishkıimine tigilgen, salmaǵy 15 gr. gashısh tabyldy. Ol da jelilik polıtsııa bólimshesine tapsyryldy.
Esirtki tasymaldaýshylardy ustaýdan sońǵy kezderi Qostanaı shekara otrıadynyń «Qaıraq avto» bólimshesiniń qyraǵylyǵyn atap ótýge bolady. Búgin túnde, saǵat 03.30-da osy bólimsheniń shekara narıady «Rýdnyı - Ekaterınbor» baǵytymen ketip bara jatqan jolaýshylar avtobýsyn tekserý kezinde № 41-42 oryndardyń ústindegi sóreden marıhýana tapty. Bul esirtkiniń ıesi retinde taǵy da 18 jastaǵy, biraq bul joly qazaqstandyq bozbala jigit ustaldy. Esirtki zaty ıesimen birge Qarabalyq aýdandyq ishki ister bólimine tapsyryldy.
