Esirtkimen kúres: 4 uıymdasqan qylmystyq top quryqtaldy

ASTANA. QazAqparat – Jyl basynan beri 2,5 myńǵa jýyq esirtki qylmysy anyqtaldy. Bul týraly Іshki ister mınıstrligi Esirtki qylmysyna qarsy is-qımyl departamentiniń basqarma basshysy Baqytjan Ámirhanov aıtty, dep habarlaıdy QazAqparat tilshisi.

«Esirtki men nashaqorlyq qoǵamdy qatty alańdatyp otyr. Elimizdegi ahýalǵa 3 negizgi faktor áser etedi. Birinshiden, Ortalyq Azııa, Qazaqstan, Reseı memleketteri arqyly ótip, ári qaraı Eýropaǵa aparatyn «Soltústik baǵyt» boıynsha aýǵan geroıniniń trafıgi bar. Ekinshiden, sıntetıkalyq esirtkilerdiń keń taralý qaýpi bar. Úshinshiden, elimizdiń ońtústik óńirlerinde (Shý alqaby jáne Qyzylorda oblysy) kannabısten jasalatyn esirtkiniń túrleri bar», - dedi B. Ámirhanov Ortalyq kommýnıkatsııalar qyzmetinde.

Onyń aıtýynsha, jyl basynan beri barlyq quqyq qorǵaý jáne arnaıy organdar birlesip 2,5 myńǵa (2168-in ІІM anyqtady) jýyq esirtki qylmysyn anyqtady. Onyń 60 paıyzy (1,5 myń) esirtki satý qylmysyna qatysty.

«Jalpy, 12,7 tonna esirtki tárkilendi. Osy oraıda esirtkinin negizgi túrlerine toqtalsaq, geroın – 33 keli, apıyn – 68 keli, sıntetıka – 507 keli, gashısh – 705 keli, marıhýanna 4 tonnadan astam bolsa, qalǵany esirtkiniń basqa da túrleri», - dedi basqarma basshysy.

Onyń sózine qaraǵanda, 4 uıymdasqan qylmystyq toptyń áreketi áshkere boldy. Sonyń ishinde uıymdasqan qylmystyq toptyn 32 belsendi múshesi quryqtaldy. Olar 13 asa aýyr esirtki qylmysyn jasaǵany úshin aıyptaldy.