Esirtkige jol joq: Almatyda balalar men jasóspirimder arasynda Nomad MMA týrnıri ótti

ASTANA. QazAqparat - Almatydaǵy arnaıy joǵary sport sheberligi mektebinde Nomad MMA boıynsha balalar men jasóspirimder arasynda «ESIRTKIGE JOL JOQ» atty ashyq týrnır ótti. Aıta keteıik, baıqaý Dúnıejúzilik esirtkige qarsy kúres kúni aıasynda ótti, dep habarlaıdy QazAqparat tilshisi.

Nomad MMA – qazaqsha úlgidegi aralas jekpe-jek sporty, onda sportshylar judyryqpen soǵý jáne tebý ádisterin, sondaı-aq kúres ádisterin qoldana otyryp, tolyq baılanysta jarysady. Týrnırge 10 men 16 jas aralyǵyndaǵy 154 jas sportshy qatysyp, 18 salmaq jáne jas sanatynda júldeli oryndar úshin kúresti. Týrnırge Almaty, Almaty oblysy jáne Jetisý óńirinen jas balýandar qatysty. Jeńimpazdar uıymdastyrýshylar men seriktester tarapynan syılyqtar men marapattarǵa ıe boldy.

Týrnırge álemdik deńgeıdegi jarystardy baǵalaýda úlken tájirıbesi bar Dúnıejúzilik WFN federatsııasynyń (World Federation Nomad MMA) tóreshileri arnaıy shaqyryldy.

«Esirtki tutyný – asa qaýipti áleýmettik aýrý. Memleket basshysy esirtkini óndirý men taratýǵa qarsy kúrestiń ulttyq sıpat alýy kerektigin qadap aıtyp otyr», - dedi MMA aralas jekpe-jek federatsııasynyń vıtse-prezıdenti Gadjı Gadjıev.

Onyń aıtýynsha, qazir nashaqorlyqtyń aldyn alý jáne nashaqorlar sanyn azaıtý úshin qoǵamnyń kúsh-jigerin biriktirý mańyzdy.

«Bizdiń týrnır jasóspirimder men jastar arasynda salaýatty ómir saltyn nasıhattaýǵa da óz úlesin qosady dep oılaımyz», - deıdi Nomad MMA federatsııasynyń Almaty qalasy boıynsha fılıalynyń jetekshisi Mıkaıl Nadırov.

Týrnırdi uıymdastyrýshy Nomad MMA respýblıkalyq federatsııasynyń Almaty qalasyndaǵy fılıaly boldy. Týrnırge Almaty qalalyq polıtsııa departamentiniń Esirtki qylmysyna qarsy kúres basqarmasy da qoldaý kórsetti.