Esirtkige qarsy strategııa boıynsha jumys josparyn qabyldaý kerek - QR Prezıdenti
"Óńirdegi qaýipsizdikti qamtamasyz etý máselesi de barynsha ózekti. ShYU-nyń seriktes eli Shrı-Lankadaǵy osy jyldyń sáýirinde oryn alǵan teńdessiz terakt BUU qamqorlyǵymen jahandyq lańkestikke qarsy koalıtsııa qurý jónindegi qazaqstandyq bastamanyń ózekti ekendigin dáleldeıdi. Qazaqstannyń BUU Bas assambleıasynyń 73-sessııasynda usynǵan terrorızmnen azat álemge qol jetkizý jónindegi kodeksi halyqaralyq terrorızmge qarsy kúreste óziniń mańyzdy rólin atqarady", - dedi Qazaqstan Prezıdenti.
Memleket basshysy jahandyq jelidegi terrorızm problemasy da alańdaýshylyq týdyratyndyǵyn jáne kıberqaýipsizdikti qamtamasyz etý boıynsha qosymsha sharalardy talap etip, ShYU-nyń aqparattyq qaýipsizdik ortalyǵyn qurýǵa túrtki bolatyndyǵyn basa aıtty.
"Esirtkige qarsy strategııany júzege asyrý boıynsha jumys josparyn qabyldaý da mańyzdy dep sanaımyz. Biz ShYU hatshylyǵynyń BUU qamqorlyǵymen jumys isteıtin esirtki zattarynyń zańsyz aınalymymen kúres jónindegi Ortalyq Azııa óńirlik aqparattyq úılestirý ortalyǵymen kooperatsııany tereńdetý kúsh-jigerin qoldaımyz. Ortalyq Azııa óńirlik aqparattyq úılestirý ortalyǵy aımaqtaǵy esirtki qaýpine qarsy áreket etý boıynsha birlesken sharalar úshin tuǵyrnama bola alady dep esepteımiz", - dedi Q.Toqaev.