Esirtkige qarsy kúres: Jambyl zaýytynan 4 tonna kúkirt qyshqyly tárkilendi

TARAZ. QazAqparat – Jambyl oblysynda «Dármek» jedel aldyn alý is-sharasynyń qorytyndysy shyǵaryldy, dep habarlaıdy QazAqparat tilshisi.

5-9 qyrkúıek aralyǵynda Shý alqabynan Qazaqstan óńirlerine esirtki zattaryn ótkizýge qarsy is-qımyl boıynsha aýqymdy respýblıkalyq aktsııa ótti. «Dármek» jedel aldyn alý is-sharasy barysynda polıtseıler Jambyl oblysyndaǵy 30 dárihana, 2 emhana, 3 emdeý mekemesi, 1 uıym men 1 zaýytty tekserdi.

«Úsh kún ishinde quqyq qorǵaý organdarynyń qyzmetkerleri esirtkige baılanysty 33 quqyq buzýshylyq faktisin anyqtady. Onyń ishinde bes fakti – qylmystyq. Anyqtalǵan faktilerdiń kópshiligi – qoǵamdyq oryndarda esirtkini paıdalaný, zańsyz saqtaý jáne kontrabanda. Ákimshilik quqyq buzýshylyqtar kóbinese farmatsevtıkalyq qyzmet erejelerin jáne esirtki aınalymy salasyndaǵy tehnıkalyq talaptardy buzý boıynsha jasalǵan», - dedi Jambyl oblysy polıtsııa departamentiniń esirtki qylmysyna qarsy is-qımyl basqarmasynyń bastyǵy, polıtsııa polkovnıgi Asqar Jumabekov.

Aıtýynsha, Jambyl oblysyndaǵy zaýyttardyń birinen tekseris barysynda 4 tonna kúkirt qyshqyly prekýrsory tabylyp, tárkilengen. Bul – esirtkiniń aýyr túrlerin óndirýge qajetti qramdas zat.

Atalǵan fakti boıynsha Qazaqstan Respýblıkasy Ákimshilik quqyq buzýshylyq týraly kodeksiniń 427-baby boıynsha hattama toltyryldy.

Jedel aldyn alý is-sharasynyń úsh kúni ishinde zańsyz aınalymnan 32 kelige jýyq túrli esirtki zattary tárkilendi.