Esirtkige eltigen kúdikti týysqan qaryndasyn zorlap, pyshaqtap óltirdi
ASTANA. 6 aqpan. QazAqparat - Almaty qalasynyń tártip saqshylary 22 jasar boıjetkendi óltirdi degen kúdikpen buryn esirtki qylmysy úshin sotty bolǵan jábirlenýshiniń týysqan aǵasy, 30 jasar jergilikti turǵyndy quryqtady.
Bul týraly búgin Astanada ótken brıfıngte QR ІІM resmı ókili Nurdildá Oraz málim etti.
Keleńsiz jaǵdaı bylaı órbigen: qandy oqıǵa oryn alǵannan birneshe kún buryn kúdikti jábirlenýshiniń ata-anasynyń úıinde qonaqta bolǵan kórinedi. Ustalǵan azamat tańerteń ıtterdi tamaqtandyryp keleıik degen syltaýmen boıjetken qaryndasyn jeke menshik kóligine otyrǵyzyp alady da úıine qaraı jol tartady.
«Úıiniń aýlasyna kirgen bette esirtkiden kózi qaraýytqan kúdikti jábirlenýshini tarpa bas salyp, zorlaıdy da, qylmysynyń izin jasyrý maqsatynda týysqan qaryndasyn pyshaqtap óltiredi. Máıitti ol óz úıiniń janyndaǵy qarǵa kómip tastaǵan»,-dedi resmı ókil. Qazir ol ýaqytsha ustaý ızolıatoryna qamaýǵa alynǵan. Tergeý amaldary jalǵasýda.
