Esirtkige eltigen kólik júrgizýshisi jolaýshy tasymaldaǵan - SQO
PETROPAVL. QazAqparat – Soltústik Qazaqstan oblysynda esirtki tutynyp, zańsyz jolaýshy tasymalymen aınalysqan kólik júrgizýshisi 15 táýlikke qamaýǵa alynýy múmkin, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, aýdan ortalyǵy Taıynshada patrýldik polıtsııa qyzmetkerleri qolynda ruqsat qujattary bolmasa da jolaýshy tasymaldap júrgen Folksvagen golf avtomobıliniń júrgizýshisin toqtatqan. 32 jastaǵy jergilikti turǵyn medıtsınalyq kýálandyrýdan ótti. Nátıjesinde onyń esirtki tutynǵany anyqtaldy. Materıal sotqa jiberiledi, quqyq buzýshy 15 táýlikke ákimshilik qamaýǵa alynýy jáne aldaǵy 7 jylda kólik quralyn basqarýǵa tyıym salynýy múmkin.
SQO-da 20-22 qańtar kúnderi polıtseıler «Avtobýs» jedel-profılaktıkalyq is-sharasyn ótkizdi. Onyń maqsaty - jolaýshylar tasymaly qaýipsizdigin qamtamasyz etý. Tártip saqshylary avtobýs jáne taksı júrgizýshilerin nazarǵa aldy.
«Úsh kún ishinde olardyń tarapynan 241 zań buzýshylyq tirkeldi. 21 qańtarda Petropavlda eki avtobýs júrgizýshisi ákimshilik jaýapkershilikke tartyldy. Olar Nazarbaev jáne Chkalov kóshelerinde belgilengen jerden joldan ótpek bolǵan jaıaý júrginshilerge jol bermegen. Jaıaý júrginshiler ótkeline jaqyndaǵanda, sheshim qabyldaýǵa ýaqyt qaldyrý úshin jyldamdyqty báseńdetý kerektigin eske salamyz», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
Sondaı-aq, polıtseıler manevr jasaý erejelerin buzýdyń 44 faktisin ashty. Kólik júrgizý kezinde telefonmen sóılesken 46 júrgizýshi anyqtalyp, 16-sy josparly tekserýden óte almady, 9-y jyldamdyqty asyrǵan. Avtobýs parkiniń úsh laýazymdy tulǵasy baǵdarǵa tehnıkalyq aqaýy bar kólikterdi shyǵarǵany úshin jaýapqa tartyldy.
