Esirtki jarnamalaıtyn graffıtı salatyndarǵa qandaı jaza qoldanylady

NUR-SULTAN. QazAqparat – Jyl basynan beri elordada esirtki qylmysyna qatysty 800-den astam adam qylmystyq jaýapkershilikke tartyldy. Bul týraly Nur-Sultan qalalyq polıtsııa departamenti Esirtki qylmysyna qarsy is-qımyl bóliminiń bastyǵy Sergeı Ilınyh aıtty, dep habarlaıdy QazAqparat tilshisi.

«Sýret, graffıtı salý qylmystyq áreketine jastar, stýdentter tartylady. Olar tipti mundaı áreketteri úshin qylmystyq jaýapkershilikke tartylatyndyqtaryn da bilmeıtinderi bar. Japsyrmalar, sýretter qaldyratyndardyń kópshiligine, jastarǵa 6 jylǵa deıin bas bostandyǵynan aıyrý jazasy kózdelgen. Mundaı áreketter túngi ýaqytta beıne baqylaý kamerasy joq jerlerde jasalady. Qazirgi ýaqytta ákimdikpen, aýdandardyń ákimdikterimen birlesip, qalanyń barlyq bóligin tsıfrlandyrý júrgizilýde. Bul jastar jazbalar men esirtki jasyratyn oryndar qaldyrmaýy úshin jasalyp jatyr», - dedi Sergeı Ilınyh.

Onyń atap ótýinshe, esirtki kýrerine, esirtki zattaryn jasyryn orynǵa qoıyp ketetin adamdarǵa 25 jylǵa deıin bas bostandyǵynan aıyrý jáne múlkin tárkileý jazasy kózdelgen. Jaza merzimi esirtki zatynyń salmaǵyna, qylmystyń aýyrlyǵyna baılanysty bolmaq.

Jalpy, jyl basynan beri elorda aýmaǵynda esirtkiniń zańsyz aınalymy faktisimen 800-den astam adam qylmystyq jaýapkershilikke tartyldy. Kún saıyn qalada ortasha eseppen 3 adamnyń ústinen esirtki qylmysyna baılanysty is qozǵalady